កម្ពុជា ធ្វើជាម្ចាស់ផ្ទះនៃវគ្គហ្វឹកហ្វឺន បច្ចេកទេសបោសសម្អាតមីន ថ្នាក់អាស៊ាន និងតំបន់លើកទី៥

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព នៅថ្ងៃទី២១ ខែវិច្ឆិកា ឆ្នាំ២០២២ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកវគ្គហ្វឹកហ្វឺន បច្ចេកទេសបោសសម្អាតមីននិងគ្រប់គ្រងចំការមីនថ្នាក់អាស៊ាន និងថ្នាក់តំបន់លើកទី៥ សម្រាប់UNPKO។
ក្នុងពិធីនេះ ឯកឧត្តម មានប្រសាសន៍ថា វគ្គហ្វឹកហ្វឺននេះ ពិតជាមានសារៈសំខាន់ណាស់ ក្នុងការចែករំលែកព័ត៌មាននិងបទពិសោធន៍ពីគ្នាទៅវិញទៅមក ស្របគ្នានឹងការយកចិត្តទុកដាក់លើវិស័យមីន ដោយកម្ពុជាបានចាត់ទុកវិស័យនេះ ជាវិស័យអាទិភាពទី១៨បន្ថែម ពីលើគោលដៅអភិវឌ្ឍន៍ប្រកបដោយចីរភាពទាំង១៧ របស់អង្គការសហប្រជាជាតិ។

ឯកឧត្តម សែម សុវណ្ណនី បញ្ជាក់ឱ្យដឹងថា កម្ពុជានឹងដកស្រង់មេរៀន បទពិសោធន៍ថ្មីៗ ព្រមទាំងធ្វើនវានុវត្តលើចំណេះជំនាញថែមទៀត ពីការពិភាក្សាស៊ីជម្រៅក្នុងវគ្គហ្វឹកហ្វឺននេះ ដើម្បីបង្កើនសមត្ថភាព និងប្រសិទ្ធភាពការងាររបស់ខ្លួនថែមទៀត ក្នុងប្រទេសសាម៉ី និងក្នុងប្រតិបត្តិការរក្សាសន្តិភាពសម្រាប់អនាគត។

ឯកឧត្តម ឧត្តមសេនីយ៍ទោ ប្រាក់ សុទ្ធ អគ្គនាយករងមជ្ឈមណ្ឌលជាតិរក្សាសន្តិភាព បានឱ្យដឹងថា វគ្គហ្វឹកហ្វឺនគ្រូបង្គោលជំនាញបោសសម្អាតមីនថ្នាក់អាស៊ាន និងតំបន់ ដែលមានរយៈពេលជាង៣សប្តាហ៍ ចាប់ពីថ្ងៃទី២១ ខែវិច្ឆិកា រហូតដល់ថ្ងៃទី៩ ខែធ្នូ ឆ្នាំ២០២២ មានគោលបំណងផ្តល់ការគាំទ្រដល់ប្រតិបត្តិការសន្តិភាពអង្គការសន្តិភាព នឹងអនុវត្តតាមរូបមន្ត យុទ្ធសាស្ត្រ សកម្មភាពមីន អ.ស.ប (UMASS) ប្រព័ន្ធគ្រប់គ្រងព័ត៌មានស្តីពីសកម្មភាពមីន (IMSMA) យុទ្ធសាស្ត្រសកម្មភាពមីនថ្នាក់ជាតិ(NMAS) និងបទពិសោធន៍ជាក់ស្តែង ដែលបានមកពីអាជ្ញាធរមីនកម្ពុជា ក៏ដូចជាការដកស្រង់ផ្ទាល់ពីតំបន់បេសកកម្មមកធ្វើសក្ខីកម្ម សម្រាប់អនុវត្តទាំងនៅក្នុងនិងក្រៅប្រទេស។

ឯកឧត្តម ឱ្យដឹងទៀតថា វគ្គនេះមានការចូលរួមពីសំណាក់យោធាចារ្យជាតិ និងអន្តរជាតិ មកពីបណ្តាប្រទេសក្នុងអាស៊ាន និងតំបន់រួមមាន បារាំងចំនួន២នាក់ អូស្រ្តាលី១នាក់ និងកម្ពុជាចំនួន៧នាក់។ ចំពោះសិក្ខាកាម មានចំនួន៣១នាក់ ឥណ្ឌូនេស៊ី៣នាក់ ថៃ២នាក់ ហ្វីលីពីន២នាក់ នេប៉ាល់២នាក់ ឡាវ២នាក់ ម៉ុងហ្គោលលី២នាក់ ម៉ាឡេស៊ី១នាក់ វៀតណាម១នាក់ បង់ក្លាដែស១នាក់ និងកម្ពុជាចំនួន១៥នាក់។ ក្នុងចំណោមសិក្ខាកាមទាំង៣១នាក់ មានសិក្ខាកាមនារីចំនុួន៥នាក់៕