សម្ដេចតេជោ ហ៊ុន សែន៖ រដ្ឋមន្ត្រីការពារជាតិចិន និងរដ្ឋមន្ត្រីការពារជាតិអាមេរិក នឹងមានជំនួបកំពូលនៅក្នុងខេត្តសៀមរាប
ភ្នំពេញ៖ ប្រមុខកម្ពុជា គឺសម្ដេចអគ្គមហាសេនាបតីតេជោ ហ៊ុន សែន លោកបានថ្លែងបញ្ជាក់ថា ប្រសិនបើគ្មានការប្រែប្រួលនោះទេ ជំនួបកំពូលរវាងរដ្ឋមន្ត្រីក្រសួងការពារជាតិរបស់ចិន និងរដ្ឋមន្ត្រីក្រសួងការពារជាតិ សហរដ្ឋអាមេរិក នឹងត្រូវធ្វើឡើងនៅក្នុងខេត្តសៀមរាប ដែលនឹងនាំទៅដល់សុខស្ថិរភាពនៅក្នុងតំបន់ និងក្នុងពិភពលោក។
នាខណៈពេលសម្ដេចអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកព្រឹត្តិការណ៍កីឡាជាតិលើកទី៣ និងកីឡាជនពិការលើកទី១ នៅល្ងាចថ្ងៃទី ២១ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ សម្ដេចតេជោ ហ៊ុន សែន បានគូសបញ្ជាក់ថា៖ [នៅប៉ុន្មានថ្ងៃខាងមុខនេះ ប្រសិនបើគ្មានអ្វីប្រែប្រួលទេនោះ ជំនួបកំពូលរវាងរដ្ឋមន្ត្រីក្រសួងការពារជាតិរបស់ចិន និងរដ្ឋមន្ត្រីករសួងការពារជាតិរបស់សហរដ្ឋអាមេរិក នឹងមានជំនួបមួយនៅក្នុងខេត្តសៀមរាប។ ក៏អាចចាត់ទុកថា ប្រទេសកម្ពុជា ជាទីកន្លែងនៃការសម្របសម្រួលមួយរវាងមហាអំណាច ដែលនឹងនាំទៅដល់សុខ ស្ថេរភាពនៅក្នុងតំបន់ និងក្នុងពិភពលោក]។ សម្ដេចតេជោសង្ឃឹមថា រដ្ឋមន្ត្រីក្រសួងការពារជាតិសហរដ្ឋអាមេរិក និង ចិន នឹងធ្វើកិច្ចការដ៏ល្អនៅក្នុងទឹកដីនៃខេត្តសៀមរាប ដែលសម្ដេចលោកនឹងមានវត្តមាននាថ្ងៃស្អែកនេះផងដែរ។
ពាក់ព័ន្ធនិងវិស័យកីឡានេះផងដែរ សម្ដេចតេជោ នាយករដ្ឋមន្ត្រីបានមានប្រសាសន៍ថា កីឡាឬក៏ការងារអ្វីផ្សេងទៀតក៏ដោយ មិនអាចរស់នៅដោយគ្មានសន្តិភាពបានទេ កីឡាក្ដី ឬអភិវឌ្ឍន៍សេដ្ឋកិច្ចសង្គម ក្ដី លទ្ធិប្រជាធិបតេយ្យ សិទ្ធិមនុស្ស ឬអ្វីផ្សេងទៀតក៏ដោយ មិនអាចរស់ដោយគ្មានសន្តិភាពបាននោះទេ។ យើងមិនអាចរស់នៅជាមួយនឹងសង្គ្រាមនោះឡើយ។ ដូច្នេះហើយសូមចូលរួមរក្សាសន្តិភាព ដើម្បីយើងទាំងអស់គ្នាអភិវឌ្ឍន៍ប្រទេសជាតិរបស់យើង។
សូមបញ្ជាក់ផងដែរថា ពិធីបើកការប្រកួតកីឡាជាតិលើកទី៣ និងកីឡាជនពិការលើកទី១ នេះ ជាការរៀបចំជាសាកល្បង ក៏ដូចទៅនឹងការរៀបចំពិធីបើកការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ នាពេលខាងមុខដែរ ដើម្បីធានាបាននូវសុវត្ថិភាព និងសន្ដិសុខ សណ្ដាប់ធ្នាប់ល្អ។ ការប្រកួតកីឡាជាតិលើកទី៣ គោលបំណងសំខាន់ៗ ចំនួន ប្រាំចំណុច រួមមាន ៖១/ផ្ដល់ឱកាសដល់សហព័ន្ធកីឡាជាតិ បានដាក់មន្ដ្រីបច្ចេកទេសដែលបានបណ្ដុះបណ្ដាលរួចឱ្យអនុវត្តក្នុងការរៀបចំប្រកួតជាក់ស្ដែងនៅលើទីលាន ដើម្បីទទួលបានចំណេះដឹងនិងបទពិសោធន៍នៃការរៀបចំការប្រកួតក្នុងព្រឹត្តិការណ៍ស៊ីហ្គេម។ ២/កីឡាករកីឡាការិនីបានវាស់ស្ទង់គុណផលកីឡា និងទទួលបានបទពិសោធន៍នៃការប្រកួត។៣/អាចប៉ាន់ស្មានតម្រូវការទីលាននិងសម្ភារឧបករណ៍បច្ចេកទេស តាមស្ដង់ដារនៃការប្រកួតជាលក្ខណៈហ្គេម។៤/តេស្ដសាកល្បងនៃការរៀបចំពិធីបើកបិទ ឱ្យស្របតាមស្ដង់ដារនៃការប្រកួតជាលក្ខណៈហ្គេម។ ៥/ជាការសាកល្បងចុងក្រោយសម្រាប់ត្រៀមលក្ខណៈធ្វើម្ចាស់ផ្ទះនៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ និងជាការពង្រឹងការរៀបចំការប្រកួតក្នុងរបទនៃជំងឺកូវីដ១៩ ដោយត្រូវអនុវត្តតាមគោលការណ៍ប្រតិបត្តិស្ដង់ដារ[SOP] និងការគោរពតាមវិធានសុវត្ថិភាពសុខភាពរបស់ក្រសួងសុខាភិបាល។។
