ចំនួនអ្នកស្លាប់ដោយសារគ្រោះរញ្ជួយដីនៅឥណ្ឌូណេស៊ីកើនឡើងដល់ ២៦៨នាក់ ហើយ ១៥១នាក់នៅតែបាត់ខ្លួន
ហ្សាការតា៖ មន្ត្រីក្នុងតំបន់បាននិយាយកាលពីថ្ងៃអង្គារថា ចំនួនអ្នកស្លាប់ដោយសារគ្រោះរញ្ជួយដីកាលពីថ្ងៃចន្ទនៅភាគខាងលិចប្រទេសឥណ្ឌូនេស៊ីបានកើនឡើងដល់ ២៦៨ នាក់ហើយ និង ១៥១ នាក់ទៀតកំពុងបាត់ខ្លួននៅឡើយ។
ប្រធានទីភ្នាក់ងារគ្រប់គ្រងគ្រោះមហន្តរាយជាតិ Suharyanto បានប្រាប់សន្និសីទសារព័ត៌មានថា “ចំនួនអ្នកស្លាប់បានកើនឡើងដល់ ២៦៨ នាក់ហើយ” ។
លោកបានបញ្ជាក់ថា គ្រោះរញ្ជួយដីកម្រិត ៥.៦ រ៉ិចទ័រ ដែលបានវាយប្រហារខេត្ត West Java របស់ឥណ្ឌូនេស៊ី កាលពីថ្ងៃចន្ទ ក៏បានបណ្តាលឲ្យមនុស្សចំនួន ១,០៨៣ នាក់រងរបួស និងបានបង្ខំឱ្យមនុស្ស ៥៨,៣៦២ នាក់ផ្សេងទៀតភៀសខ្លួនចេញពីផ្ទះ ខណៈដែលការរញ្ជួយដីនេះបានបំផ្លាញផ្ទះ និងហេដ្ឋារចនាសម្ព័ន្ធជាង ២១,០០០ ខ្នង។
លោក Suharyanto បានឲ្យដឹងថា ប្រតិបត្តិការស្វែងរក និងជួយសង្គ្រោះសម្រាប់ជនរងគ្រោះដោយការរញ្ជួយដីកំពុងដំណើរការនៅឡើយ។
កាលពីព្រឹកថ្ងៃអង្គារ ប្រធានាធិបតីឥណ្ឌូនេស៊ី លោក Joko Widodo បានស្នើឱ្យអាជ្ញាធរផ្តល់អាទិភាពដល់ប្រតិបត្តិការ និងជួយសង្គ្រោះជនរងគ្រោះជាមុនសិន។
លោកប្រធានាធិបតីបានឲ្យដឹងនៅពេលទៅទស្សនាតំបន់ដែលរងផលប៉ះពាល់ដោយរញ្ជួយដី រដ្ឋាភិបាលនឹងផ្តល់សំណងដល់ផ្ទះដែលរងការខូចខាតដោយសារការរញ្ជួយដីដែលមានតម្លៃចាប់ពី ១០ លានរូពីទៅ ៥០ លានរូពី។
លោក Widodo បានសង្កត់ធ្ងន់ថា ផ្ទះថ្មីដែលត្រូវសាងសង់ត្រូវតែអាចទប់ទល់នឹងការរញ្ជួយដី។
ទីភ្នាក់ងារឧតុនិយម អាកាសធាតុ និងភូគព្ភសាស្ត្រ បាននិយាយថា គ្រោះរញ្ជួយដីបានកើតឡើងនៅម៉ោង ១៣៖២១នាទី ម៉ោងនៅទីក្រុងហ្សាការតា (០៦២១ GMT) កាលពីថ្ងៃចន្ទ ជាមួយនឹងចំណុចកណ្តាលនៅចម្ងាយ ១០គីឡូម៉ែត្រ ភាគនិរតីនៃស្រុក Cianjur ក្នុងខេត្ត West Java និងជម្រៅ ១០គីឡូម៉ែត្រ នេះបើតាមទីភ្នាក់ងារឧតុនិយម អាកាសធាតុ និងភូមិសាស្ត្រ។