ប្រាក់ឧបត្ថម្ភគោលនយោបាយ របស់រាជរដ្ឋាភិបាល លើកដំបូងត្រូវបានបើកផ្តល់ជូនយោធិនសោធននិវត្តន៍ ក្នុងអង្គភាពកងពលតូចថ្មើរជើងលេខ៥១
ភ្នំពេញ៖ ឯកឧត្តម ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវា និងជាប្រធានអនុគណៈកម្មការ គោលនយោបាយយោធិនពលី មរណៈបង្កស្លាប់ បាត់ខ្លួន ពិការ និងសោធននិវត្តន៍ នៅថ្ងៃទី២៨ ខែវិច្ឆិកា ឆ្នាំ២០២២ បានអញ្ជើញដឹកនាំក្រុមការងារ ចុះបើកប្រាក់ឧបត្ថម្ភគោលនយោបាយលើកដំបូង ជូនយោធិនសោធននិវត្តន៍ ក្នុងអង្គភាពកងពលតូចថ្មើរជើងលេខ៥១ ក្រុមការងារអនុគណៈកម្មការ បានសំណេះសំណាលជាមួយយោធិនសោធននិវត្តន៍ និងបានផ្សព្វផ្សាយនីតិវិធី នៃការបើកប្រាក់ឧបត្ថម្ភគោលនយោបាយមួយលើកដំបូងជូនដល់យោធិន មុននឹងផ្ទេរទៅក្រសួងសង្គមកិច្ច អតីតយុទ្ធជន និងយុវនីតិសម្បទា។
ឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ បានរាយការណ៍ យោធិនសោធននិវត្តន៍ ក្នុងអង្គភាពកងពលតូចថ្មើរជើងលេខ៥១ មានចំនួន ៣៤នាក់ ដែលនឹងត្រូវបើកប្រាក់គោលនយោបាយរបស់រាជរដ្ឋាភិបាលលើកដំបូង មុននឹងត្រូវផ្ទេរទៅក្រសួងសង្គមកិច្ច អតីតយុទ្ធជន និងយុវនីតិសម្បទា។
ក្នុងឱកាសនោះដែរ ឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ សូមគោរពថ្លែងអំណរគុណចំពោះប្រមុខរាជរដ្ឋាភិបាលដែរតែងតែយកចិត្តទុកដាក់ ដល់សុខទុកយោធិនដែលខិតខំបំពេញភារៈកិច្ចជូនជាតិមាតុភូមិ លះបង់សាច់ស្រស់ ឈាមស្រស់ ដើម្បីបុព្វហេតុជាតិនឹងប្រជាជន ៕
