អូស្រ្តាលីផ្ដល់ថវិកា១៥លានដុល្លា លើសកម្មភាពទប់ស្កាត់អំពើហិង្សាលើស្រ្តីនៅកម្ពុជា
ភ្នំពេញ៖ តាំងពីឆ្នាំ២០១៣ មកអូស្រ្តាលីបានរួមចំណែកជាទឹកប្រាក់ចំនួន១៥លានដុល្លា ដល់ការអនុវត្តនូវផែនការសកម្មភាពជាតិស្តីពីការទប់ស្កាត់អំពើហិង្សាលើស្រ្តី។
តាមរយៈហ្វេសប៊ុក ស្ថានទូតអូស្រ្តាលីបានឲ្យដឹងថា អូស្រ្តាលី ជួយដល់ជនរងគ្រោះ អំពើហិង្សាក្នុងគ្រួសារ ឱ្យទទួលបានសេវាផ្លូវច្បាប់ តាំងពីឆ្នាំ២០១៣ មកអូស្រ្តាលីបានរួមចំណែកជាទឹកប្រាក់ចំនួន១៥លានដុល្លា ដល់ការអនុវត្តនូវផែនការសកម្មភាពជាតិស្តីពីការទប់ស្កាត់អំពើហិង្សាលើស្រ្តី។
ប្រភពបន្តថា តាមរយៈកម្មវិធីសហប្រតិបត្តិការអូស្រ្តាលី-កម្ពុជាដើម្បីការផ្តល់សេវាប្រកបដោយនិរន្តរភាព និងសមធម៌ (ACCESS) យើងធ្វើការយ៉ាងជិតស្និទ្ធជាមួយក្រសួងកិច្ចការនារីរបស់រាជរដ្ឋាភិបាលកម្ពុជា ដើម្បីធ្វើឱ្យកាន់តែប្រសើរនូវការគាំទ្រ និងការផ្តល់សេវាសម្រាប់ជនរងគ្រោះដោយអំពើហិង្សាទាក់ទងនឹងយេនឌ័រ។
ប្រភពដដែលបញ្ជាក់ថា ជនរងគ្រោះដោយអំពើហិង្សាក្នុងគ្រួសារម្នាក់ នៅខេត្តសៀមរាប បាននិយាយថា៖ «ខ្ញុំរីករាយណាស់ ដែលករណីរបស់ខ្ញុំត្រូវបានដោះស្រាយ។ ខ្ញុំសូមលើកទឹកចិត្តដល់ស្រ្តីជាជនរងគ្រោះនៅសហគមន៍របស់ខ្ញុំ កុំនៅស្ងៀមស្ងាត់ពេលពួកគាត់ជួបបញ្ហា។ សូមស្វែងរកអ្នកផ្តល់សេវា ដែលអាចជួយ និងដោះស្រាយករណីនេះរហូតដល់បញ្ហាត្រូវបានដោះស្រាយ»៕