រដ្ឋបាលខេត្តតាកែវ រៀបចំបូកសរុបលទ្ធផលការងារ ប្រចាំឆ្នាំ២០២២ និងលើកទិសដៅឆ្នាំ២០២៣ របស់សាខាកាកបាទក្រហមកម្ពុជាខេត្ត
ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នាព្រឹកអង្គារ ទី២៩ ខែវិច្ឆិកា ឆ្នាំ២០២២ បានអញ្ជើញបើកកិច្ចប្រជុំបូកសរុបលទ្ធផលការងារ ប្រចាំឆ្នាំ២០២២ និងលើកទិសដៅឆ្នាំ២០២៣ របស់សាខាកាកបាទក្រហមកម្ពុជាខេត្ត។
ដែលកិច្ចប្រជុំនេះក៏មានការអញ្ជើញការចូលរួមពី ឯកឧត្តម លោកជំទាវ លោក លោកស្រី ប្រធាន អនុប្រធាន នាយកប្រតិបត្តិសាខា អនុប្រធានសាខាកាកបាទក្រហមកម្ពុជា ក្រុង ស្រុក និងមន្ត្រីសាខាពាក់ព័ន្ធផងដែរ។
ក្នុងកិច្ចប្រជុំនេះឯកឧត្តមប្រធាន មានប្រសាសន៍ថា ក្រោមការដឹកនាំផ្ទាល់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សាខាកាកបាទក្រហមកម្ពុជាខេត្តតាកែវ បានអនុវត្តសកម្មភាពការងារវិស័យអាទិភាពទាំង៤ រួមមាន៖ ការងារគ្រប់គ្រងគ្រោះមហន្តរាយវិបត្តិភ័យ និងការប្រែប្រួលអាកាសធាតុ សុខភាព និងការថែទាំសុខភាពក្នុងសហគមន៍ ការលើកកម្ពស់គោលការណ៍គ្រឹះ និងតម្លៃមនុស្សធម៌ និងការអភិវឌ្ឍស្ថាប័ន និងអភិវឌ្ឍធនធាន។
មានប្រសាសន៍បើកកិច្ចប្រជុំនាឱកាសនោះដែរ ឯកឧត្តមប្រធាន បានសម្តែងការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ រួមទាំងមន្ត្រីក្រុមប្រតិបត្តិ ដែលបានខិតខំបំពេញភារកិច្ចយ៉ាង សកម្ម ធ្វើជាសេនាធិការអោយគណៈ កម្មាធិការសាខាក្នុងការដឹកនាំជំរុញធ្វើអោយវិស័យអាទិភាពទាំង៤របស់កាកបាទក្រហមកម្ពុជា រយៈពេល ១០ខែ ឆ្នាំ២០២២នេះ ក្នុងបរិការណ៍ ដែលការឆ្លងរាលដាលនៃជម្ងឺកូវីដ-១៩ មានសភាពធូរស្រាល បង្កភាពអនុគ្រោះច្រើនដល់សាខា ក្នុងការផ្តល់សេវាកម្មមនុស្សធម៌ រហូតសម្រេចបានលទ្ធផលល្អ ពិសេសការលើកកំពស់សកម្មភាពការងារឥស្សរជនឆ្នើមថ្នាក់ជាតិនៅថ្នាក់សាខា៖
១. ការអប់រំផ្សព្វផ្សាយស្តីពីការចូលរួមលើកកំពស់សុវត្ថិភាពចរាចរណ៍ផ្លូវគោក និងបរិយាប័ន ។
២. ការបណ្តុះបណ្តាលជាមូលដ្ឋានដល់យុវជនអ្នកស្ម័គ្រចិត្តកក្រក។
៣. ការអភិវឌ្ឍន៍ស្ថាប័ន។
៤. ការផ្តល់ជំនួយសង្រ្គោះ ផ្តល់អំណោយមនុស្សធម៌ជូនជនរងគ្រោះ និងជនងាយរងគ្រោះបានទាន់ពេលវេលាស្របតាមទិសស្លោក” ទីណាមានទុក្ខលំបាកទីនោះ មានកាកបាទក្រហមកម្ពុជា ” ។
សូមជម្រាបជូនផងដែរថា យោងតាមរបាយការណ៍របស់សាខាកាកបាទក្រហមកម្ពុជាខេត្តតាកែវរយៈពេល ១០ខែ ឆ្នាំ២០២២ សាខាកាកបាច់ក្រហមកម្ពុជាខេត្តតាកែវ បាននាំយកអំណោយមនុស្សធម៌ទៅចែកជូនគ្រួសារប្រជាពលរដ្ឋ រងគ្រោះគ្រប់ប្រភេទ ទូទាំងខេត្តបានចំនួន ៦០៥គ្រួសារ ដោយក្នុងនោះសាខាបានប្រើប្រាស់សម្ភារៈសរុបចំនួន៖ អង្ករ ចំនួន ១២.៥៧៥គីឡូក្រាម, ក្រណាត់តង់ ៣៩១, កន្ទេលជ័រ ៤១៦, មុង ៤១៦, ភួយ ៤១៦, សារុង ៤១៦, ក្រមា ៤១៦, មី ២៥កេស, ទឹកក្រូច ១៩៦កេស, ទឹកបរិសុទ្ធ ១៩៦កេស, ទឹកគោឆៅ ៥០ឡូ, ឃីតទារក ៤០ឃីត, អាវយឺត ២០៨អាវ, សម្ភារៈផ្ទះបាយ ១៦ឃីត និងបន្ថែមថវិកាមួយចំនួនផងដែរ៕
