ឯកឧត្ដម សោម ពិសិដ្ឋ អញ្ជើញចូលរួមអបអរសាទរពិធីបិទការប្រកួតកីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២

ភ្នំពេញ៖ ឯកឧត្ដមបណ្ឌិត  សោម ពិសិដ្ឋ អភិបាលនៃគណៈអភិបាលខេត្តកែប នាល្ងាចថ្ងៃពុធ ទី៣០ ខែវិច្ឆិកា ឆ្នាំ២០២២ បានអញ្ជើញចូលរួមអបអរសាទរពិធីបិទការប្រកួតកីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅពហុកីឡដ្ឋានជាតិមរតកតេជោ។

ព្រឹត្តិការណ៍ប្រកួតកីឡាជាតិលើកទី៣ និងកីឡាជនពិការជាតិលើកទី១ នេះ ធ្វើឡើងក្រោមពាក្យស្លោក «កីឡានាំមកនូវសន្តិភាព និងការអភិវឌ្ឍ» មានរយៈពេលប្រមាណ ១២ថ្ងៃ គឺចាប់ពីថ្ងៃទី១៩ ដល់ថ្ងៃទី៣០ ខែវិច្ឆិកា ។

ក្រោមការដឹកនាំយ៉ាងប៉ិនប្រសប់ និងឈ្លាសវៃរបស់ ឯកឧត្ដមអភិបាលខេត្ត ធ្វើឲ្យវិស័យសិល្បៈ និងកីឡារបស់ខេត្តកែបមានការរីកចម្រើនជាលំដាប់ពីមួយថ្ងៃទៅមួយថ្ងៃ រហូតទទួលបានជ័យលាភីជាបន្តបន្ទាប់ ដែលទាំងនេះជាមោទកភាពណាស់សម្រាប់ខេត្តកែបទាំងមូល ។

ជាក់ស្ដែងក្នុងឆ្នាំ២០២២នេះ ក្រុមសិល្បៈល្ខោនបាសាក់ខេត្តកែបបានទទួលចំណាត់ថ្នាក់លេខ១ ទូទាំងប្រទេស ហើយក្នុងការប្រកួតកីឡាជាតិលើកទី៣នេះក៏ខេត្តកែបនៅតែបន្តទទួលបានលទ្ធផលល្អប្រសើរជាងកីឡាជាតិលើកទី១ និងទី២ ដែលក្រោយបញ្ចប់ការប្រកួតជាស្ថាពរ ខេត្តកែបទទួលបានមេដាយសរុបទាំងអស់ចំនួន ៣០គ្រឿង រួមមាន មេដាយមាសចំនួន ០៨គ្រឿង មេដាយប្រាក់ចំនួន ១៣គ្រឿង និងមេដាយសំរឹទ្ធិចំនួន ០៩គ្រឿង៕