លោកជំទាវកិត្តិបណ្ឌិត អ៊ឺង កន្ថាផាវី អញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការបន្ទប់បំបៅដោះកូននៅក្រសួងកិច្ចការនារី

ភ្នំពេញ៖ ក្រសួងកិច្ចការនារី នាព្រឹកថ្ងៃសុក្រ ៩កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០២ ខែធ្នូ ឆ្នាំ២០២២ បានរៀបចំពិធីសម្ភោធដាក់ឱ្យប្រើប្រាស់ជាផ្លូវការបន្ទប់បំបៅដោះកូនគំរូនៅក្រសួងកិច្ចការនារី ក្រោមអធិបតីភាព លោកជំទាវកិត្តិបណ្ឌិត អ៊ឺង កន្ថាផាវី រដ្ឋមន្រ្តីក្រសួងកិច្ចការនារី។
ការរៀបចំបង្កើតបន្ទប់បំបៅដោះកូន នឹងចូលរួមចំណែកក្នុងការអនុវត្តន៍ផែនការយុទ្ធសាស្រ្តនារីរតនៈទី៥ លើមុំទី២ស្តីពីការលើកកម្ពស់ការអប់រំរបស់ស្រ្តី និងក្មេងស្រី និងមុំទី៣ស្តីពីការលើកកម្ពស់សុខភាព និងអាហាររូបត្ថម្ភ។

ក្រសួងកិច្ចការនារី បានផ្តួចផ្តើមគំនិតក្នុងការបង្កើតបន្ទប់បំបៅដោះកូន ដើម្បីសម្រួលដល់បុគ្គលិកជាស្រ្តីមានកន្លែងសមរម្យក្នុងការបន្តបំបៅដោះកូនប្រកបដោយអារម្មណ៍ស្រស់ស្រាយ កក់ក្តៅនៅពេលពួកគាត់ត្រលប់មកធ្វើការវិញ ក្រោយពីសម្រាលមាតុភាព៕