ឯកឧត្ដម កែវ រតនៈ ចែករំលែកបទពិសោធន៍ ដល់សិស្សានុសិស្ស ថ្នាក់ទី១២ នៃវិទ្យាល័យក្នុងខេត្តពោធិ៍សាត់ ដើម្បីឈានឲ្យបានសម្រេចបំណងប្រាថ្នា
ពោធិ៍សាត់៖ ឯកឧត្ដម កែវ រតនៈ រដ្ឋមន្ត្រី ប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកក្រគរ និងស្រុកកណ្តៀង នៅថ្ងៃទី០៣ ខែធ្នូ ឆ្នាំ២០២២ បានគូសបញ្ជាក់ថា ផ្តើមចេញពីកូនកសិករ រហូតឈានក្លាយខ្លួនជាថ្នាក់ដឹកនាំ និងជាអគ្គនាយកអគ្គិសនីកម្ពុជា ដែលមានវ័យក្មេងជាងគេផងនោះ លោកក៏ធ្លាប់បានជួបនូវបញ្ហាលំបាកនានាជាច្រើន ក្នុងរបបខ្មៅងងឹតខ្មែរក្រហម រហូតរួចផុតពីការកាប់សម្លាប់ អាចរស់រានមានជីវិត ទទួលបានសុខនិងមានឱកាសសិក្សារៀនសូត្រ ឈានទៅសម្រេចគោលបំណង ឲ្យក្លាយជាអ្នកគ្រប់គ្រងដឹកនាំមកដល់បច្ចុប្បន្ន។
ឯកឧត្ដម កែវ រតនៈ បានលើកឡើងបែបនេះ នៅឯស្នាក់ការគណបក្សខេត្ត នាឱកាសជួបសំណេះសំណាល ជាមួយសិស្សានុសិស្ស ថ្នាក់ទី១២ នៃវិទ្យាល័យពោធិ៍សាត់ និងវិទ្យាល័យទាចំរ៉ាត់ ប្រហែល៤០០នាក់ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២២ នាថ្ងៃទី០៥.០៦ ខែធ្នូ ឆ្នាំ២០២២ខាងមុខ ដោយមានការចូលរួមពីនាយក នាយករង លោកគ្រូ អ្នកគ្រូ និងប្អូនៗក្មួយៗសិស្សានុសិស្ស ថ្នាក់ទី១២ នៃវិទ្យាល័យទាំង២យ៉ាងច្រើនកុះករ។
ក្នុងឱកាសនោះ ឯកឧត្ដម កែវ រតនៈ បានថ្លែងថា យើងមានឱកាសជួបជុំគ្នានាពេលនេះ គឺដោយសារសម្តេចតេជោ ហ៊ុន សែន បានយកអាយុជីវិតទៅប្តូរ រហូតទទួលបានសន្តិភាព និងការអភិវឌ្ឍមកទល់សព្វថ្ងៃ។
ផ្តើមចេញពីកូនកសិករ រហូតឈានក្លាយជារដ្ឋមន្ត្រី អមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ដែលមានវ័យក្មេងជាងគេផងនោះ ឯកឧត្ដម កែវ រតនៈ ក៏បានចែករំលែកនូវបទពិសោធន៍ផ្ទាល់ខ្លួន ដែលធ្លាប់បានជួបនូវបញ្ហាលំបាកនានា ក្នុងរបបខ្មែរក្រហម រហូតរួចផុតពីការកាប់សម្លាប់ អាចរស់រានមានជីវិត ទទួលបានសុខសន្តិភាព និងមានឱកាសសិក្សារៀនសូត្រ ឈានទៅសម្រេចគោលបំណង ក្លាយជាថ្នាក់ដឹកនាំមកដល់បច្ចុប្បន្ន ទាំងនេះដោយសារការខិតខំប្រឹងប្រែង ជំនះគ្រប់ឧបសក្តិរបស់ខ្លួនយើងផ្ទាល់ ពិសេសក្រោមម្លប់សន្តិភាពរបស់សម្តេច។
ឯកឧត្ដមក៏បានកោតសរសើរ ដល់សាស្រ្តាចារ្យ លោកគ្រូ អ្នកគ្រូ ដែលបានយកចិត្តទុកដាក់ចិត្ត ខិតខំបង្ហាត់បង្រៀនដល់សិស្សានុសិស្ស មិនថាមានបញ្ហាទុក្ខលំបាកយ៉ាងណា ក៏មិនថ្អូញថ្អែរ ហើយតស៊ូពុះពារគ្រប់ឧបសគ្គ។
ពិតប្រាកដណាស់ថា នៅថ្ងៃទី៥ពេលដ៏ខ្លីខាងមុខ ប្អូនៗក្មួយៗទាំងអស់ នឹងចូលរួមប្រឡងសញ្ញាបត្រមធ្យមសិក្សាទុតិយភូមិ, ក្នុងនាមថ្នាក់ដឹកនាំ លោកក៏សូមជូនពរដល់ប្អូនៗក្មួយៗសិស្សានុសិស្សទាំងអស់ ឱ្យប្រឡងជាប់គ្រប់ៗគ្នា ដើម្បីឈានទៅសម្រេចបំណងប្រាថ្នា ទៅថ្ងៃអនាគត។
ឯកឧត្ដមក៏បានជំរុញ និងលើកទឹកចិត្តឱ្យប្អូនៗសិស្សានុសិស្សខិតខំរៀនសូត្រ អភិវឌ្ឍន៍ខ្លួនឱ្យមានសមត្ថភាព ដើម្បីយកចំណេះដឹង និងជំនាញ មកអភិវឌ្ឍន៍មូលដ្ឋានភូមិ.ឃុំ.ស្រុកយើងឱ្យកាន់តែរីកចម្រើនទៀត។ ជាការលើកទឹកចិត្ត ដល់ប្អូនៗក្មួយៗសិស្សានុសិស្ស ថ្នាក់ទី១២ នៃវិទ្យាល័យពោធិ៍សាត់ និងវិទ្យាល័យទាចំរ៉ាត់ លោកបានប្រកាសរៀបចំដំណើរទស្សនកិច្ចសិក្សា នាំប្អូនៗក្មួយៗ ទៅកាន់ខេត្តសៀមរាប ដែលជាបេះដូងនៃប្រទេសកម្ពុជា ក្រោយបញ្ចប់ការប្រឡងសញ្ញាបត្រមធ្យមសិក្សាទុតិយភូមិ និងបានចែកជូនថវិកា ដល់ប្អូនៗក្មួយៗ។។
