មនុស្ស ៤នាក់ រងរបួសធ្ងន់ស្រាលក្នុងករណីគ្រោះថ្នាក់ចរាចរណ៍រថយន្តបុករថយន្ត នៅស្រុកភ្នំស្រួច

ភ្នំពេញ៖ មនុស្សចំនួន ៤នាក់ បានរងរបួសធ្ងន់ស្រាលក្នុងករណីគ្រោះថ្នាក់ចរាចរណ៍រថយន្តបុករថយន្ត។

ហេតុការណ៍បានកើតឡើងនៅថ្ងៃទី០៥ ខែធ្នូ ឆ្នាំ២០២២ វេលាម៉ោង១២នឹង៤៦នាទី នៅផ្លូវជាតិលេខ04 ចន្លោះគីឡូម៉ែត្រលេខ៨២-៨៣ ត្រង់ចំណុចភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

តាមការបញ្ជាក់ពីសមត្ថកិច្ចបានឲ្យដឹងថា មុនពេលកើតហេតុ មានរថយន្ត០១គ្រឿង ម៉ាក ហ៊ីយ៉ានដាយ ពណ៌ស គ្មានស្លាកលេខ បើកបរដោយឈ្មោះ ឈុនលី គៀង ភេទប្រុស អាយុ២៩ឆ្នាំ រស់នៅសង្កាត់ច្បារអំពៅ ភ្នំពេញ អ្នករួមដំណើរ២នាក់ ទី១-ឈ្មោះ ឡូញ អឹង ភេទប្រុស អាយុ២៤ឆ្នាំ ភូមិជីរោម៍ ឃុំរោងដំរី ស្រុកបាភ្នំ ខេត្តព្រៃវែង ទី២-ឈ្មោះ ប៊ុត សុខនឿន ភេទប្រុស អាយុ៣៥ឆ្នាំ រស់នៅព្រៃរោន ស្រុកល្វាឯម ខេត្តកណ្តាល បើកបរពីទិសខាងលិចទៅកើត មកដល់ចំណុចខាងលើ ផ្ទុះកង់បានរេចង្កូតទៅបុករថយន្ត NISSAN (UD) ពណ៌បៃតង ពាក់ស្លាកលេខចង្កូតស្តាំ PP-1886 បើកបរដោយឈ្មោះ លី ប៊ុនលី ភេទប្រុស អាយុ៤០ឆ្នាំ រស់នៅភូមិបឹងតាព្រុំ ឃុំបឹងតាព្រំ ស្រុកព្រៃនប់ ខេត្តព្រះសីហនុ ដែលបើកបរបញ្រ្ចាសទិសគ្នា បណ្តាលអោយរងរបួសធ្ងន់០៣នាក់ ប្រុស និងរងរបួស ស្រាល០១នាក់ ប្រុស។

ចំពោះអ្នករបួសខាងលើ ត្រូវបានរថយន្ត ពេទ្យឯកជនផ្សារតាឡាត់ដឹកបញ្ជូនទៅសង្រ្គោះអស់ រកណីនេះមិនមានការកកស្ទះទេ អាចធ្វើចរាចរណ៍ជាធម្មតាបាន៕