ឯកឧត្តម ស៊ុន សុវណ្ណារិទ្ធិ ចុះសួរសុខទុក្ខ និងនាំយកគ្រឿងឧបភោគបរិភោគចែកជូនប្រជាពលរដ្ឋដែលរងគ្រោះដោយអគ្គីភ័យ ចំនួន១០គ្រួសារ នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង

ភ្នំពេញ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានសាខាកាកបាទក្រហមកម្ពុជាខេត្ត រួមជាមួយលោកជំទាវ កែ ច័ន្ទមុនី អនុប្រធានកិត្តិយសសាខាកាកបាទក្រហមខេត្ត ព្រមទាំងសមាជិក សមាជិកាគណៈកម្មាធិការសាខា លោកនាយកសាខា លោកអភិបាលក្រុង និងអាជ្ញាធរមូលដ្ឋាន នារសៀលថ្ងៃទី៦ ខែធ្នូ ឆ្នាំ២០២២ បានចុះសួរសុខទុក្ខ និងនាំយកគ្រឿងឧបភោគបរិភោគចែកជូនប្រជាពលរដ្ឋដែលរងគ្រោះដោយអគ្គីភ័យ កាលពីយប់ថ្ងៃទី៥ ខែធ្នូ ឆ្នាំ២០២២ ចំនួន១០គ្រួសារ និងជនរងគ្រោះម្នាក់ដែលបានជួយក្នុងហេតុការណ៍នោះ នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង។

ឯកឧត្តម ស៊ុន សុវណ្ណារិទ្ធិ និងលោកជំទាវ កែ ច័ន្ទមុនី បានពាំនាំប្រសាសន៍សាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានចូលរួមសោកស្ដាយចំពោះការខូចខាតផ្ទះសម្បែង សម្ភារ ព្រមទាំងវត្ថុមានតម្លៃដែលបាត់បង់ក្នុងគ្រោះ​អគ្គីភ័យនេះ ដែលជាកម្លាំងញើសឈាមរបស់បងប្អូនប្រជាពលរដ្ឋខិតខំរកបានដោយលំបាក និងសូមកុំមានការអស់សង្ឃឹម ត្រូវបន្តតស៊ូខិតខំ ប្រឹងប្រែងបន្តទៅមុខទៀត។

ក្នុងឱកាសនោះ ក្រុមការងារបានផ្ដល់អំណោយមួយចំនួនជូនគ្រួសាររងគ្រោះ រួមមាន៖ អង្ករ មី ត្រីខ តង់ ឃីត(មុង ភួយ សារុង ក្រមា) កន្ទេល សម្ភារ និងថវិកាមួយចំនួន៕