ឯកឧត្ដម ស៊ុន សុវណ្ណារិទ្ធិ អញ្ជើញចូលរួមជួបសំណេះសំណាល និងសួរសុខទុក្ខប្រជាពលរដ្ឋដែលរស់នៅជាមួយនឹងជំងឺអេដស៍ចំនួន ៦៤គ្រួសារ នៅស្រុកទឹកផុស

ភ្នំពេញ៖ ឯកឧត្ដម ស៊ុន សុវណ្ណារិទ្ធិ ប្រធានគណៈកម្មាធិការសាខា កាកបាទក្រហមកម្ពុជា ខេត្តកំពង់ឆ្នាំង និងលោកជំទាវ រួមដំណើរដោយលោកជំទាវ កែ ច័ន្ទមុនី អនុប្រធានកិត្តិយសសាខា លោក លោកស្រី អនុប្រធាន និងសមាជិកគណៈកម្មាធិការសាខាកាកបាទក្រហមខេត្ត ប្រធាន និងសមាជិកអនុសាខាកាកបាទក្រហមស្រុក នារសៀលថ្ងៃទី៨ ខែធ្នូ ឆ្នាំ២០២២នេះ បានអមដំណើរលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា អញ្ជើញជួបសំណេះសំណាល និងសួរសុខទុក្ខប្រជាពលរដ្ឋដែលរស់នៅជាមួយនឹងជំងឺអេដស៍ចំនួន ៦៤គ្រួសារ នៅស្រុកទឹកផុស។

លោកជំទាវ អគ្គលេខាធិការកាកបាទក្រហមកម្ពុជា បានពាំនាំនូវព្រះរាជបណ្ដាំសួរសុខទុក្ខរបស់សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងការសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់អំពីជីវភាពរស់នៅរបស់ប្រជាពលរដ្ឋងាយរងគ្រោះនៅគ្រប់ទីកន្លែង និងគ្រប់ពេលវេលា។

ក្នុងឱកាសនោះ លោកជំទាវអគ្គលេខាធិការ រួមជាមួយឯកឧត្តម ស៊ុន សុវណ្ណារិទ្ធិ និងភរិយា ព្រមទាំងក្រុមការងារ បានផ្ដល់ព្រះរាជអំណោយសម្ដេចព្រះមហាក្សត្រី និងអំណោយរបស់កាកបាទក្រហមកម្ពុជា ជូនដល់បងប្អូនប្រជាពលរដ្ឋទាំង ៦៤គ្រួសារ ដោយមួយគ្រួសារទទួលបាន អង្ករ មី ត្រីខ ទឹកស៊ីអ៊ីវ ឃីត(មានមុង ភួយ សារុង ក្រមា) សាប៊ូដុសខ្លួន ជែល ចង្កៀងប្រើថាមពលពន្លឺព្រះអាទិត្យ(បន្ទះសូឡា និងអំពូលភ្លើង) និងថវិកាមួយចំនួន។

បន្ថែមពីនេះ លោកជំទាវក៏បានផ្ដល់ថ្នាំពេទ្យ និងគ្រឿងបរិក្ខារពេទ្យមួយចំនួនជូនដល់ក្រុមគ្រូពេទ្យផងដែរ៕