រដ្ឋបាលខេត្តសៀមរាប ជំនួបពិភាក្សាការងារជាមួយ តំណាងក្រុមហ៊ុន EUM Place នៃសាធារណរដ្ឋកូរ៉េ ស្ដីពីការលេីកកម្ពស់អាជីវកម្ម ការផ្លាស់ប្ដូរ និងកិច្ចសហប្រតិបត្តិការប្រកបដោយមិត្តភាព
ភ្នំពេញ៖ លោក ពិន ប្រាកដ អភិបាលរងខេត្តសៀមរាប តំណាង ឯកឧត្ដម ទៀ សីហា អភិបាល នៃគណៈអភិបាលខេត្ត នារសៀលថ្ងៃសុក្រ ១រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៩ ខែធ្នូ ឆ្នាំ២០២២ បានជំនួបពិភាក្សាការងារជាមួយ តំណាងក្រុមហ៊ុន EUM Place នៃសាធារណរដ្ឋកូរ៉េ ដឹកនាំដោយលោក Kim Mu Young នាយកប្រតិបត្តិក្រុមហ៊ុន EUM Place នៃសាធារណរដ្ឋកូរ៉េ ស្ដីពីការលេីកកម្ពស់អាជីវកម្ម ការផ្លាស់ប្ដូរ និងសហប្រតិបត្តិការប្រកបដោយមិត្តភាព។ ដោយមានការអញ្ជេីញចូលរួមពី ប្រតិភូអមដំណេីរ លោក លោកស្រី មន្ត្រីពាក់ព័ន្ធ សរុបចំនួន ១១នាក់។
គោលបំណងនៃជំនួបពិភាក្សានេះ គឺដេីម្បី ពិភាក្សាលេីការងារបញ្ជូនពលករទៅបរទេស ការកសាងបទដ្ឋាន លក្ខណៈវិនិច្ឆ័យ និងនីតិវិធីឱ្យបានគ្រប់ជ្រុងជ្រោយក្នុងការជ្រើសរើស និងអប់រំបណ្តុះបណ្តាល ដើម្បីបំពេញសំណូមពរ និងលក្ខខណ្ឌការងារប្រកបដោយតម្លាភាព
សម្របសម្រួលឱ្យបានជិតស្និទ្ធជាមួយស្ថាប័នពាក់ព័ន្ធក្នុងប្រទេស ដើម្បីបង្កលក្ខណៈងាយស្រួលដល់ការជ្រើសរើស បណ្តុះបណ្តាល បញ្ជូន និងគ្រប់គ្រងពលករខ្មែរទៅធ្វើការនៅសាធារណរដ្ឋកូរ៉េ រៀបចំ និងចាត់ចែងបែបបទបញ្ជូន និងគ្រប់គ្រងពលករដែលទៅធ្វើការនៅសាធារណរដ្ឋកូរ៉េរហូតត្រឡប់មកកម្ពុជាវិញ និងទំនាក់ទំនងជាមួយភាគីកូរ៉េ ដើម្បីក្តាប់ព័ត៌មាន និងតម្រូវការទីផ្សារការងារ ហើយដោះស្រាយឱ្យបានទាន់ពេលវេលា។
សូមបញ្ជាក់ថា កម្ពុជាយេីងមានក្រុមប្រឹក្សាភិបាលបណ្តុះបណ្តាល និងបញ្ជូនពលករទៅបរទេស ត្រូវបានបង្កើតឡើងស្របតាមអនុក្រឹត្យលេខ៧០ អនក្រ.បក ចុះថ្ងៃទី២៥ ខែកក្កដា ឆ្នាំ២០០៦ ស្តីពីការបង្កើតក្រុមប្រឹក្សាភិបាលបណ្តុះបណ្តាល និងបញ្ជូនពលករទៅបរទេស និងត្រូវបានកែសម្រួលតាមរយៈអនុក្រឹត្យលេខ១៦៨ អនក្រ.បក ចុះថ្ងៃទី០៧ ខែវិច្ឆិកា ឆ្នាំ២០០៧ ស្ដីពីកំណែតម្រូវឈ្មោះក្រុមប្រឹក្សាភិបាលបណ្តុះបណ្តាល និងបញ្ជូនពលករទៅបរទេស ទៅជាគណៈកម្មាធិការបណ្តុះបណ្តាល និងបញ្ជូនពលករទៅបរទេស៕
