សម្ដេចតេជោ ហ៊ុន សែន៖ កូវីដ១៩ ធ្វើឲ្យប្រព័ន្ធឌីជីថលក្នុងវិស័យអប់រំនៅកម្ពុជា ដើរមុនផែនការ១០ឆ្នាំ
(ព្រុចសែល)៖ ប្រទេសប៊ែលហ្សិក នៅយប់ថ្ងៃទី១២ ខែធ្នូ ឆ្នាំ២០២២នេះ [ម៉ោងនៅប្រទេសកម្ពុជា] សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា លោកបានថ្លែងប្រាប់ទៅប្រជាពលរដ្ឋខ្មែររស់នៅទ្វីបអឺរ៉ុបថា ក្នុងវិបត្តិជំងឺកូវីដ១៩ រាជរដ្ឋាភិបាលកម្ពុជាមានការព្រួយបារម្ភចំពោះការខកខានសិក្សារៀនសូត្ររបស់សិស្ស ក្នុងគ្រាដែលប្រទេសកម្ពុជាត្រូវបានបិទខ្ទប់ជាបន្ដបន្ទាប់។
នៅក្នុងជំនួបជាមួយប្រជាពលរដ្ឋខ្មែរប្រមាណ២ពាន់នាក់ សម្ដេចតេជោ ហ៊ុន សែន ក៏បានអះអាងថា បើទោះបីវិបត្តិជំងឺកូវីដ១៩ បានធ្វើឲ្យរាជរដ្ឋាភិបាលកម្ពុជា បារម្ភចំពោះការខកខានរៀនសូត្ររបស់សិស្សានុសិស្សដោយផ្ទាល់ ប៉ុន្ដែការសិក្សាតាមរយៈប្រព័ន្ធអនឡាញ ក៏ជាឱកាសមួយថ្មីផងដែរសម្រាប់ប្រទេសកម្ពុជា។ ក្នុងវិបត្តិជំងឺសកលមួយនេះ បានធ្វើឲ្យប្រព័ន្ធឌីជីថលក្នុងវិស័យអប់រំ នៅក្នុងប្រទេសកម្ពុជា ដើរមុនផែនការរហូតដល់ទៅ១០ឆ្នាំ។
សម្ដេចតេជោ ហ៊ុន សែន លោកបានមានប្រសាសន៍គូសបញ្ជាក់យ៉ាងដូច្នេះថា [កង្វល់របស់សម្ដេចនៅពេលនោះ បញ្ហាគឺបិទសាលារៀន ដែលសិស្ស និស្សិតរបស់យើងប្រមាណជិត៤លាននាក់ឯណោះ រៀនតាមអនឡាញ ដែលនេះក៏ផ្ដល់នូវកាលានុវត្តន៍ភាព ដូចគេនិយាយថា វិបត្តិ តែងមានកាលានុវត្តន៍ភាព។ កូវីដបែរជាជំរុញឲ្យមានការរីកលូតលាស់ផ្នែកខាងបច្ចេកវិទ្យាព័ត៌មាន កាន់តែខ្លាំងនៅក្នុងប្រទេសកម្ពុជា។ ឌីជីថលអាចដើរលឿនមិនតិចជាង៣ឆ្នាំទេ បើក្រសួងអប់រំគិតថាទៅមុន១០ឆ្នាំ ព្រោះសិស្សរាប់លាននាក់រៀនតាមអនឡាញ]។
សម្ដេចតេជោនាយករដ្ឋមន្ដ្រី បានបញ្ជាក់ចំណុចទាំងនេះទៅកាន់ប្រជាពលរដ្ឋខ្មែររស់នៅក្រៅប្រទេស ពិសេសប្រទេសជឿនលឿន ប្រយ័ត្នដើរមិនទាន់ប្រជាពលរដ្ឋខ្មែររស់នៅក្រៅប្រទេសនោះឡើយ។។
