ឯកឧត្តម ជា ស៊ីណា ដឹកនាំសិក្ខាសាលាពិគ្រោះយោបល់លើសេចក្តីព្រាងអនុក្រឹត្យស្តីពីការត្រួតពិនិត្យការបំពុលខ្យល់ ការរំខានដោយសំឡេង និងរំញ័រ
ភ្នំពេញ៖ ឯកឧត្តម ជា ស៊ីណា អនុរដ្ឋលេខាធិការក្រសួងបរិស្ថាន នៅថ្ងៃទី១៤ ខែធ្នូ ឆ្នាំ២០២២នេះ បានដឹកនាំសិក្ខាសាលាពិគ្រោះយោបល់លើសេចក្តីព្រាងអនុក្រឹត្យស្តីពីការត្រួតពិនិត្យការបំពុលខ្យល់ ការរំខានដោយសំឡេង និងរំញ័រ ដែលបានប្រព្រឹត្តទៅនៅសណ្ឋាគារឆ្នេរថ្មី ខេត្តព្រះសីហនុ។
សិក្ខាសាលានេះដោយមានការអញ្ជើញចូលរួមពីឯកឧត្តម ប៉ាក សុខារ៉ាវុត អគ្គនាយកនៃអគ្គនាយកដ្ឋានគាំពារបរិស្ថាន ឯកឧត្តម លោក លោកស្រី តំណាងអគ្គនាយកដ្ឋានតំបន់ការពារធម្មជាតិ អគ្គនាយកដ្ឋានចំណេះដឹងនិងព័ត៌មានបរិស្ថាន អគ្គនាយកដ្ឋានសហគមន៍មូលដ្ឋាន អគ្គនាយកដ្ឋានគោលនយោបាយនិងយុទ្ធសាស្រ្ត អគ្គនាយកដ្ឋានរដ្ឋបាលនិងហិរញ្ញវត្ថុ និងលោក លោកស្រី តំណាងនាយកដ្ឋានជំនាញចំណុះអគ្គនាយកដ្ឋានគាំពារបរិស្ថាន សរុបចំនួន៣០រូប។
សិក្ខាសាលាពិគ្រោះយោបល់នេះ រៀបចំឡើងក្នុងគោលបំណងពិនិត្យ ផ្ដល់យោបល់ និងប្រមូលធាតុចូលពីអ្នកចូលរួមទាំងអស់ ដើម្បីឱ្យសេចក្តីព្រាងអនុក្រឹត្យស្តីពីការត្រួតពិនិត្យការបំពុលខ្យល់ ការរំខានដោយសំឡេង និងរំញ័រ មានភាពគ្រប់ជ្រុងជ្រោយ និងអាចយកមកអនុវត្តបានដោយរលូន មានប្រសិទ្ធភាពក្នុងការត្រួតពិនិត្យ និងការចាត់វិធានការក្នុងការកាត់បន្ថយការបំពុលពីប្រភពនានា ព្រមទាំងឆ្លើយតបនឹងបញ្ហាប្រឈម និងការវិឌ្ឍន៍របស់សង្គម-សេដ្ឋកិច្ច នាពេលបច្ចុប្បន្ន៕
