អភិបាលខេត្តកំពង់ឆ្នាំង ដឹកនាំកិច្ចប្រជុំត្រួតពិនិត្យការងារផ្ដល់សេវាសាធារណៈជូនប្រជាពលរដ្ឋនៅរដ្ឋបាលក្រុង ស្រុក ឃុំ សង្កាត់ទូទាំងខេត្ត

ភ្នំពេញ៖ ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង នាព្រឹកថ្ងៃទី១៤ ខែធ្នូ ឆ្នាំ២០២២ បានដឹកនាំកិច្ចប្រជុំត្រួតពិនិត្យការងារផ្ដល់សេវាសាធារណៈជូនប្រជាពលរដ្ឋនៅរដ្ឋបាលក្រុង ស្រុក ឃុំ សង្កាត់ទូទាំងខេត្ត ដោយមានការចូលរួមពីអភិបាលរងខេត្ត នាយករដ្ឋបាលសាលាខេត្ត ប្រធានមន្ទីរ អង្គភាព អភិបាលក្រុង ស្រុក និងមេឃុំ ចៅសង្កាត់។

ឯកឧត្តមអភិបាលខេត្ត បានណែនាំដល់អាជ្ញាធរគ្រប់លំដាប់ថ្នាក់ ត្រូវបន្តយកចិត្តទុកដាក់ផ្ដល់សេវាសាធារណៈជូនប្រជាពលរដ្ឋឲ្យបានល្អប្រសើរ ត្រូវខិតខំដោះស្រាយបញ្ហាលំបាកជូនប្រជាពលរដ្ឋឲ្យបានទាន់ពេលវេលា យកចិត្តទុកដាក់ជាប្រចាំចំពោះសុខទុក្ខ និងជីវភាពរបស់ប្រជាពលរដ្ឋនៅមូលដ្ឋាន មិនត្រូវទុកឲ្យប្រជាពលរដ្ឋណាម្នាក់ជួបការលំបាកដោយអាជ្ញាធរមិនបានដឹង។

លើសពីនេះ ឯកឧត្តមអភិបាលខេត្ត ក៏បានណែនាំឲ្យអាជ្ញាធរ សមត្ថកិច្ច និងមន្ទីរជំនាញពាក់ព័ន្ធ ត្រូវបន្តជំរុញការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ជំរុញការងារចាក់វ៉ាក់សាំងកូវីដ-១៩ និងយកចិត្តទុកដាក់អនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងពេលប្រយុទ្ធនឹងជំងឺកូវីដ-១៩ កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា និងកម្មវិធីជំនួយសង្គមជាសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ធ្ងន់ធ្ងរពីគ្រោះទឹកជំនន់ ដោយត្រូវអនុវត្តឲ្យបានត្រឹមត្រូវតាមនីតិវិធី ចៀសវាងដាច់ខាតបង្កឲ្យមានបាតុភាពមិនប្រក្រតី នាំឲ្យប្រជាពលរដ្ឋមានការថ្នាំងថ្នាក់៕