ឯកឧត្តម ហ៊ុន ម៉ាណែត និងលោកជំទាវ ឧបត្ថម្ភនូវគ្រឿងឧបភោគ បរិភោគ ជូនអតីតយុទ្ធជនស្រុកកំរៀង ដែលមានជីវភាពទីទ័លក្រ ៣០គ្រួសារ
ភ្នំពេញ៖ លោកឧត្តមសេនីយ៍ត្រី ហួម ខ្វែក មេបញ្ជាការ តំបន់ប្រតិបត្តិការសឹករង បាត់ដំបង ជាអនុប្រធាន សមាគម អតីតយុទ្ធជនកម្ពុជាខេត្ត ព្រមទាំងក្រុមការងារ សមាគម អតីតយុទ្ធជនកម្ពុជាខេត្ត និងក្រុមការងារ សមាគម អតីតយុទ្ធជនកម្ពុជាស្រុកកំរៀង នាថ្ងៃទី១៥ ខែធ្នូ ឆ្នាំ២០២២ បានជួបសំណេះសំណាលសាកសួរសុខទុក្ខ និងនាំយកអំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ពេជ ចន្ទមុន្នី ជូនដល់បងប្អូនអតីតយុទ្ធជនស្រុកកំរៀងចំនួន ៣០គ្រួសារដែលមានជីវភាពទីទ័លក្រ នៅទីបញ្ជាការ មូលដ្ឋានកងរាជអាវុធហត្ថស្រុកកំរៀង។
លោកមេបញ្ជាការ បានលើកឡើងថាសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងឯកឧត្ដម កិត្តិសង្គហបណ្ឌិត គន់ គីម ទេសរដ្ឋមន្ត្រី និងជាអគ្គលេខាធិការ សមាគមអតីតយុទ្ធជនកម្ពុជា តែងតែគិតគូរពីសុខទុក្ខ ជីវភាពរស់នៅរបស់បងប្អូនអតីតយុទ្ធជនគ្រប់ពេលវេលា និងគ្រប់ទីកន្លែង ហើយសម្តេចទាំងពីរតែងតែជួយឧបត្ថម្ភទាំងថវិកា និងសម្ភារសម្រាប់សាងសង់ផ្ទះជូនបងប្អូនអតីតយុទ្ធជនរស់នៅបានសមរម្យ។
ជាមួយគ្នានោះដែរ លោកមេបញ្ជាការ ជាអនុប្រធាន សមាគមអតីតយុទ្ធជនកម្ពុជាបាត់ដំបង ក៏បានថ្លែងអំណរគុណចំពោះបងប្អូនអតីតយុទ្ធជនដែលបានលះបង់ សាច់ស្រស់ ឈាមស្រស់ ក្នុងសម័យសង្គ្រាមដើម្បីបុព្វហេតុការពារជាតិមាតុភូមិ និងប្រជាជនកន្លងមក ទើបប្រទេសជាតិយើងមានសុខសន្តិភាពពេញលេញដូចសព្វថ្ងៃនេះ។
នៅក្នុងឱកាសនោះដែរ លោកមេបញ្ជាការ ក៏បានប្រគល់នូវអំណោយឧបត្ថម្ភរបស់ឯកឧត្តម ហ៊ុន ម៉ាណែត និងលោកជំទាវ ពេជ ចន្ទមុន្នី ជូនដល់បងប្អូនអតីតយុទ្ធជនទាំង ៣០គ្រួសារ ដោយក្នុងមួយគ្រួសារទទួលបានថវិកា ៣០០០០រៀល អង្ករ ២៥គីឡូក្រាម និងគ្រឿងឧបភោគ បរិភោគមួយចំនួនផងដែរ៕
