ឧត្តមសេនីយ៍ទោ សោម ស៊ុន ដឹកនាំប្រជុំត្រួតពិនិត្យលក្ខណៈសម្បត្តិយោធិន ដែលត្រូវត្រៀមដាក់ឲ្យចូលនិវត្តន៍ នៅឆ្នាំ២០២៣ តាមការកំណត់របស់ បញ្ជាការដ្ឋានកងទ័ពជើងគោក
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី១៦ ខែធ្នូ ឆ្នាំ២០២២ បានដឹកនាំកិច្ចប្រជុំថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយមេបញ្ជាការកងឯកភាពនិងស្ថាប័ន ជំនាញដែលមានការពាក់ព័ន្ធ ដើម្បីត្រួតពិនិត្យឯកសារ និងលក្ខណៈសម្បត្តិរបស់យោធិន ដែលត្រូវត្រៀមដាក់ឲ្យចូលនិវត្តន៍តាមផែនការកំណត់របស់បញ្ជាការដ្ឋានកងទ័ពជើងគោក និងបញ្ជាការដ្ឋានយោធភូមិភាគទី៤ សម្រាប់ឆ្នាំ២០២៣ខាងមុខនេះ ។
លោកវរសេនីយ៍ទោ នូ វុទ្ធា នាយការិយាល័យទី១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានផែនការដាក់យោធិនទាំង២ ប្រភេទ ដល់អាយុចូលសោធននិវត្តន៍ សោធនបាត់បង់សមត្ថភាពការងារ និងការផ្ទេរយោធិនប្រភេទ២ ចេញពីក្របខណ្ឌកងយោធពលខេមរភូមិន្ទ របស់បញ្ជាការដ្ឋានកងទ័ពជើងគោក និងបានរាយការណ៍អំពីលក្ខខណ្ឌកំណត់មួយចំនួន ដែលត្រូវដាក់ឲ្យយោធិនចូលនិវត្តន៍តាមការកំណត់នៅឆ្នាំ២០២៣ខាងមុខនេះ និងបានរាយការណ៍អំពីសមាសភាពយោធិន ដែលមានគ្រប់លក្ខខណ្ឌកំណត់ ហើយត្រូវត្រៀមដាក់ឲ្យចូលនិវត្តន៍ចំនួន១០ រូប នៅឆ្នាំ២០២៣ខាងមុខនេះ ដើម្បីឆ្លងមតិពិភាក្សាក្នុងអង្គប្រជុំសម្រេច ។
បន្ទាប់មកអង្គប្រជុំបានឡើងពិភាក្សាគ្នានិងវាយតម្លៃយ៉ាងល្អិតល្អន់ អំពីលក្ខណៈសម្បត្តិ និងលក្ខខណ្ឌកំណត់ របស់យោធិនម្នាក់ៗ ដែលត្រូវត្រៀមដាក់ឲ្យចូលនិវត្តន៍នៅពេលខាងមុខតាមការកំណត់របស់បញ្ជាការដ្ឋានកងទ័ពជើងគោក និងបញ្ជាការដ្ឋានយោធភូមិភាគទី ៤ ។
ឧត្តមសេនីយ៍ទោ សោម ស៊ុន បានវាយតម្លៃខ្ពស់ចំពោះនាយទាហាន និងនាយទាហានរង ដែលមានគ្រប់លក្ខខណ្ឌកំណត់ក្នុងការដាក់ឲ្យចូលនិវត្តន៍តាមការកំណត់នៅពេលខាងមុខ ដោយកន្លងមកពួកគាត់បានខិតខំប្រឹងប្រែងគ្រប់បែបយ៉ាង ក្នុងការបំពេញតួនាទីភារកិច្ច ដែលថ្នាក់លើបានប្រគល់ជូន តែពេលនេះពួកគាត់មានសុខភាពទ្រុឌទ្រោម ហើយមានការស្ម័គ្រចិត្តដើម្បីបានសុំទៅរស់នៅជួបជុំក្រុមគ្រួសារ នៅតាមមូលដ្ឋានរៀងៗខ្លួន ក្រោមការគ្រប់គ្រងយកចិត្តទុកដាក់បន្តពីរគណៈកម្មាធិការសមាគមអតីតយុទ្ធជននៅគ្រប់បណ្ដាថ្នាក់នៅតាមមូលដ្ឋាននានានៅពេលខាងមុខ។
ឧត្តមសេនីយ៍ទោ សោម ស៊ុន បានណែនាំឱ្យស្ថាប័នជំនាញ រៀបចំសំណុំបែបបទគ្រប់គ្រាន់ដើម្បីរាយការណ៍សុំការសម្រេចពីថ្នាក់លើ និងបានសុំឱ្យមេបញ្ជាការគ្រប់គ្រងឯកភាព និងស្ថាប័នពាក់ព័ន្ធបន្តមើលថែទាំយកចិត្តទុកដាក់ពីសុខភាព និងជីវភាពរស់នៅរបស់ពួកគាត់ឱ្យបានល្អប្រសើរ ដើម្បីរង់ចាំការសម្រេចពីថ្នាក់លើនៅពេលខាងមុខ ៕
