ផ្ទះថ្មី ១ខ្នងជាអំណោយរបស់សាខាកាកបាទក្រហមកម្ពុជា ខេត្តកំពង់ធំ បានប្រគល់ជូនស្រ្តីមេម៉ាយ រស់នៅសង្កាត់អូរគន្ធរ ក្រុងស្ទឹងសែន

ភ្នំពេញ៖ សាខាកាកបាទក្រហមកម្ពុជា ខេត្តកំពង់ធំ នៅថ្ងៃទី២០ ខែធ្នូ ឆ្នាំ២០២២ បានរៀបចំពិធីប្រគល់-ទទួលផ្ទះថ្មីចំនួន ១ខ្នង ជូនស្រ្តីមេម៉ាយចំនួន ១គ្រួសារ រស់នៅសង្កាត់អូរគន្ធរ ក្រុងស្ទឹងសែន ខេត្តកំពង់ធំដែលពិធីនេះប្រព្រឹត្តទៅក្រោមអធិបតីភាព ឯកឧត្តម ងួន រតន: ប្រធានគណ:កម្មាធិការសាខាកាកបាទក្រហមកម្ពុជា ខេត្តកំពង់ធំ ។

ក្នុងឱកាសនោះឯកឧត្តម ងួន រតន: បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំ
ផ្ញើសួរសុខទុក្ខ និងការគិតគូរពីជីវភាពរស់នៅរបស់បងប្អូនប្រជាពលរដ្ឋ ជាពិសេសថ្លែងអំណរគុណយ៉ាងជ្រាលជ្រៅ
ចំពោះសាខាកាកបាទក្រហមកម្ពុជា ខេត្តកំពង់ធំ ដែលបានយកចិត្តទុកដាក់ជួយសាងសង់ផ្ទះជូនប្រជាពលរដ្ឋងាយរង
គ្រោះបំផុតជាបន្តបន្ទាប់ និងជួយសម្រាលការលំបាកដល់
ប្រជាពលរដ្ឋដូចភ្លៀងរលឹម។

ទន្ទឹមនឹងនេះ ឯកឧត្តម បានពាំនាំការអំពាវនាវពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនបងប្អូនប្រជាពលរដ្ឋទាំងអស់ត្រូវបន្តប្រឹងប្រែងប្រកបរបរ បង្កបង្កើនផល ដាំដំណាំសុវត្ថិភាពគ្រួសារដើម្បីលើកកម្ពស់ជីវភាពរស់នៅ ដូចពាក្យចាស់ថា «រពឹសដៃផ្ទៃឆ្អែត» ហើយត្រូវលើកកម្ពស់ការរក្សាអនាម័យ ពិសាទឹកដាំឆ្អិន និងសូមរស់នៅក្នុងផ្ទះថ្មីដោយក្តីសុខដុមរមនាក្រោមម្លប់នៃសន្តិភាព ស្ថិរភាព និងការអភិវឌ្ឍសព្វថ្ងៃនេះ។

ជាមួយគ្នានេះ អំណោយផ្តល់ជូនម្ចាស់ផ្ទះនីមួយៗរួមមាន ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកត្រី ១យួរ, ទឹកស៊ីអ៊ីវ ១យួរ, សម្ភារចានឆ្នាំង ១ឈុត, ឃីត (សារុង ក្រមា មុង ភួយ) ១កញ្ចប់, កន្ទេល ១,និងថវិកាមួយចំនួន៕