ជនជាតិថៃ៧នាក់ ចាញ់បោកមេខ្យល់នាំយកមកធ្វើការនៅកម្ពុជា ត្រូវបានគេយកមកទុកចោល

ភ្នំពេញ៖ នគរបាលអន្តោរប្រវេសន៍ច្រកទ្វារព្រំដែនអន្តរជាតិប៉ោយប៉ែត ប្រគល់ពលរដ្ឋថៃប្រុស.ស្រី៧នាក់ ទៅប្រទេសខ្លួនវិញបន្ទាប់ពីចាញ់បោកមេខ្យល់នាំយកមកទុកចោល នៅខាងកម្ពុជាកាល ពីវេលាម៉ោង១៩និង២០នាទី ថ្ងៃទី២០ ខែធ្នូ ឆ្នាំ២០២២ នៅច្រកទ្វារព្រំដែនអន្តរជាតិប៉ោយប៉ែត។

នគរបាលអន្តោរប្រវេសន៍ ច្រកទ្វារព្រំដែនអន្តរជាតិប៉ោយប៉ែត បានប្រគល់ជនជាតិថៃចំនួន៧នាក់ (ស្រី៥នាក់) ដែលចាញ់បោកមេខ្យល់ នាំយកមកធ្វើការនៅប្រទេសកម្ពុជា ជូនទៅលោកវរសេនីយ៍ឯក រុង ថងមន្ត (ROONG THONGMON) នាយប៉ុស្តិ៍នគរបាលអន្តោប្រវេសន៍ថៃប្រចាំខេត្តស្រះកែវ ដើម្បីជូនពួកគេទៅស្រុកកំណើតវិញ។

នគរបាលបានឲ្យដឹងថា ជនជាតិថៃចំនួន៧នាក់ (ស្រី៥នាក់) ខាងលើនេះ ត្រូវបានចាញ់បោកមេខ្យល់ នាំទៅធ្វើការនៅក្រុងបាវិត ខេត្តស្វាយរៀង តែត្រូវបានមេខ្យល់ទុកពួកគេចោល។

នគរបាលដដែលបានបញ្ជាក់ថា ដោយជនជាតិថៃទាំង៧នាក់ខាងលើនេះ បានទំនាក់ទំនងទៅស្ថានទូតនៃ ព្រះរាជាណាចក្រថៃប្រចាំកម្ពុជា បានចេញកំណត់ទូតជូនជនជាតិថៃទាំង៧នាក់នោះ ឲ្យវិលត្រឡប់ទៅប្រទេសកំណើតរបស់ខ្លួនវិញ តាមច្រកទ្វារព្រំដែនអន្តរជាតិប៉ោយប៉ែត៕