វរសេនីយ៍ឯក ភើយ លំអង ដឹកនាំនាយទាហាន នាយទាហានរងតាមបណ្តាកងឯកភាព ចំណុះតំបន់ប្រតិបត្តិការសឹករងបាត់ដំបង ចុះធ្វើទស្សនកិច្ចសិក្សាការងារ កសាងពង្រឹងអង្គភាពរឹងមាំលើគ្រប់វិស័យ នៅកងអនុសេនាធំ ផ្នែកសឹករងកំរៀង
ភ្នំពេញ៖ នាថ្ងៃទី២៣ ខែធ្នូ ឆ្នាំ២០២២ នៅកងអនុសេនាធំទី១ ផ្នែកសឹករងកំរៀង តំបន់ប្រតិបត្តិការសឹករង បាត់ដំបង បានប្រារព្ធពិធីទស្សនកិច្ចសិក្សាស្តីពីការងារកសាងពង្រឹងអង្គភាពរឹងមាំលើគ្រប់វិស័យ ក្រោមវត្តមានលោកវរសេនីយ៍ឯក ភើយ លំអង មេបញ្ជាការរង នាយសេនាធិការ តំបន់ប្រតិបត្តិការសឹករង បាត់ដំបង ស្ថិតក្នុងភូមិដីក្រហម ឃុំតាសែន ស្រុកកំរៀង ខេត្តបាត់ដំបង។
ដោយមានការចូលរួមពីលោកមេបញ្ជាការ មេបញ្ជាការរងទិស៣ស្រុក និងទិសសំឡូត លោកមេបញ្ជាការរង លោកនាយសេនាធិការរង លោកនាយ នាយរង ការិយាល័យ ផ្នែក លោកមេបញ្ជាការ មេបញ្ជាការរង កងវរសេនាតូចលេខ១ ផ្នែកសឹករង ភ្នំព្រឹក សំពៅលូន និងសំឡូត លោកមេបញ្ជាការ មេបញ្ជាការរង កងអនុសេនាធំ កងវរសេនាតូចលេខ១ ផ្នែកសឹករងទាំង៤ជាប់ព្រំដែន។
បន្ទាប់ពីអញ្ជើញចុះត្រួតពិនិត្យជាក់ស្តែងនៅកងអនុសេនាធំទី១ ផ្នែកសឹករងកំរៀង រួចមកលោកមេបញ្ជាការរង នាយសេនាធិការ និងអស់លោកមេបញ្ជាការមកពីតាមបណ្តាអង្គភាពផ្សេងៗ ក៏បានចូលរួមមតិវាយតម្លៃនូវចំណុចវិជ្ជមាន និងអវិជ្ជមានដែលអង្គភាពទាំងមូលធ្វើបាន។
លោកមេបញ្ជាការរង បានធ្វើការកោតសរសើរ និងថ្លែងអំណរគុណយ៉ាងជ្រាលជ្រៅចំពោះវត្តមាន នៃការអញ្ជើញចូលរួមដ៏កុះករពីសំណាក់ អស់លោកពីគ្រប់បណ្តាអង្គភាពជិតឆ្ងាយទាំងអស់ដែលបានចូលរួមធ្វើទស្សនកិច្ចសិក្សា ដើម្បីចែករំលែក បទពិសោធន៍រកការរីកចម្រើនផ្លាស់ប្តូរពីគ្នាទៅវិញទៅមក ហើយលោកក៏បានជំរុញ និងធ្វើការផ្តាំផ្ញើ ដល់អង្គពិធីទាំងមូល ជាពិសេសអង្គភាពកងអនុសេនាធំទី១ ផ្នែកសឹករងកំរៀង ត្រូវបន្តអនុវត្តការងារកសាងពង្រឹងអង្គភាពរឹងមាំលើគ្រប់វិស័យ ដូចដែលមានចែងនៅក្នុងផែនការកសាងពង្រឹងអង្គភាពរឹងមាំលើគ្រប់វិស័យ របស់យោធភូមិភាគទី៥ ទាំង៤ខ្លឹមសារ ដោយស្មារតីទទួលខុសត្រូវខ្ពស់ ស្មារតីច្នៃប្រឌិត តទៅមុខទៀតឲ្យដូចភ្លៀងរលឹម។
ជាចុងក្រោយលោកមេបញ្ជាការរង នាយសេនាធិការ បានក្រើនរំលឹកគ្រប់អង្គភាព ត្រូវអនុវត្តឲ្យបានរឹងមាំនូវភារកិច្ច របស់កងយោធពលខេមរភូមិន្ទ ការពារជាតិបូរណភាពទឹកដី ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព ស្ថិរភាពសង្គមជាតិយើងឲ្យបានដាច់ខាត ហើយលោកមេបញ្ជាការរង ក៏បានផ្តល់ថវិកា ចំនួន ២.០០០.០០០រៀល ដើម្បីចូលរួមចំណែកបន្តកសាងអង្គភាពបន្ថែមទៀតផងដែរ៕
