ធ្លាក់យន្តហោះរបស់កូរ៉េខាងត្បូង ស្ទាក់ចាប់យន្តហោះគ្មានមនុស្សបើករបស់កូរ៉េខាងជើង

កូរ៉េខាងត្បូង÷យោធារបស់ទីក្រុងសេអ៊ូលបានអោយដឹងថា យន្តហោះធុនស្រាល KA-១ របស់កូរ៉េខាងត្បូងបានធ្លាក់កាលពីថ្ងៃចន្ទ ខណៈដែលវាកំពុងព្យាយាមស្ទាក់ចាប់យន្តហោះគ្មានមនុស្សបើករបស់កូរ៉េខាងជើង ដែលបានចូលដែនអាកាសកូរ៉េខាងត្បូង នេះបើតាមការដកស្រង់ការផ្សាយចេញពីទីភ្នាក់ងារសារព័ត៌មានយ៉ុនហាប់។ តាមសេចក្តីរាយការណ៍ ពីឡុតទាំងពីរ បានចេញមកក្រៅ ដោយគ្មានគ្រោះថ្នាក់។

យោងតាមមន្ត្រីម្នាក់ដែលដកស្រង់ដោយ Yonhap យោធាបានរកឃើញ “វត្ថុមិនស្គាល់អត្តសញ្ញាណ” ជាច្រើនដែលសង្ស័យថាជាយានជំនិះគ្មានមនុស្សបើកនៅក្នុងខេត្ត Gyeonggi-do ជាប់ព្រំដែនប្រទេសកូរ៉េខាងជើង។យោធាបានអះអាងថា យន្តហោះគ្មានមនុស្សបើកបានឆ្លងកាត់ខ្សែបន្ទាត់ព្រំដែនយោធារវាងរដ្ឋទាំងពីរ ដោយហោះហើរលើតំបន់ Gimpo កោះ Ganghwa និង Paju ។