ឧត្តមសេនីយ៍ទោ ខូវ លី អញ្ជើញជាអធិបតីក្នុងកិច្ចប្រជុំបូកសរុបសភាពការណ៍ និងលទ្ធផលនៃកិច្ចប្រតិបត្តិការ ប្រចាំខែធ្នូ ឆ្នាំ២០២២ លើកទិសដៅសម្រាប់អនុវត្តការងារបន្ត
ភ្នំពេញ៖ លោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តកំពង់ឆ្នាំង នាព្រឹកថ្ងៃពុធ ៦កើត ខែបុស្ស ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២៨ ខែធ្នូ ឆ្នាំ២០២២ បានអញ្ជើញជាអធិបតីក្នុងកិច្ចប្រជុំបូកសរុបសភាពការណ៍ និងលទ្ធផលនៃកិច្ចប្រតិបត្តិការ ប្រចាំខែធ្នូ ឆ្នាំ២០២២ លើកទិសដៅសម្រាប់អនុវត្តការងារប្រចាំ ខែមករា ឆ្នាំ២០២៣ ។
កិច្ចប្រជុំនេះមានការចូលរួមពី លោក លោកស្រីឧត្តមសេនីយ៍ វរសេនីយ៍ ស្នងការរង លោកនាយការិយាល័យ លោកអធិការក្រុង ស្រុក និងលោកនាយប៉ុស្តិ៍នគរបាលរដ្ឋបាលទាំង៧១ប៉ុស្តិ៍ ផងដែរ ។
ក្រោយពីការអាននូវរបាយការណ៍ លទ្ធផលនៃកិច្ចប្រតិបត្តិការប្រចាំខែធ្នូ របស់លោកឧត្តមសេនីយ៍ត្រី អៀរ ប៊ុនធឿន ស្នងការរងទទួលផែនការងារសេនាធិការ បានបញ្ជប់ និងមតិចូលរួមរបស់ លោកឧត្តមសេនីយ៍ស្នងការរង លោកប្រធានការិយាល័យ លោកអធិការ លោកនាយប៉ុស្តិ៍ រួចមក លោកឧត្តមសេនីយ៍ទោ ខូវ លី មានប្រសាសន៍បូកសរុប និងវាយតម្លៃលទ្ធផលការងាររយៈពេលកន្លងមក និងបានកោតសរសើរដល់គ្រប់អង្គភាពទាំងអស់ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងការបំពេញការងាររបស់ខ្លួនបានជោគជ័យជាបន្តបន្ទាប់ ។
ចំពោះកិច្ចការមួយចំនួនដែលបំពេញហើយ តែមិនទាន់បានល្អ និងមិនទាន់ពេលវេលា លោកក៏បានផ្ដល់អនុសាសន៍កែតម្រូវ ចែករំលែកបទពិសោធន៍ដើម្បីស្ថាបនាផងដែរ ៕
