ឯកឧត្តម តូច ចាន់នី ដឹកនាំក្រុមការងារ និងមន្ត្រីជំនាញ ចុះសួរសុខទុក្ខ និងរៀបចំអាហារសាមគ្គីជូនដល់កុមារនៅក្នុងមណ្ឌលកុមារកំព្រាខេត្តព្រះវិហារ
ភ្នំពេញ៖ ឯកឧត្តម តូច ចាន់នី អគ្គនាយក នៃអគ្គនាយកដ្ឋានសេវាសង្គមកិច្ច តំណាង ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នាព្រឹកថ្ងៃទី២៩ ខែធ្នូ ឆ្នាំ២០២២ បានដឹកនាំក្រុមការងារ និងមន្ត្រីជំនាញ ចុះសួរសុខទុក្ខ និងរៀបចំអាហារសាមគ្គីជូនដល់កុមារនៅក្នុងមណ្ឌលកុមារកំព្រាខេត្តព្រះវិហារ ដើម្បីអបអរសាទរបុណ្យឆ្លងឆ្នាំសកល២០២៣ ខាងមុខ។
ក្នុងឱកាសនោះ ឯកឧត្តម អគ្គនាយក ក៏បានសម្តែងនូវការកោតសរសើរ ចំពោះអ្នកគ្រប់គ្រង និងបុគ្គលិកក្នុងមណ្ឌល ដែលបានខិតខំប្រឹងប្រែងមើលថែទាំកុមារកំព្រាយ៉ាងយកចិត្តទុកដាក់ ផ្តល់ភាពកក់ក្តៅ និងចំណេះដឹងទូទៅ ដើម្បីកែប្រែទំពាំងស្នងឬស្សីក្លាយជាធនធានមនុស្សក្នុងការជួយអភិវឌ្ឍន៍ប្រទេសជាតិនាពេលអនាគតផងដែរ។
ជាមួយគ្នានេះ ឯកឧត្តម តូច ចាន់នី អគ្គនាយកសេវាសង្គមកិច្ច បានពាំនាំមតិផ្តាំផ្ញើសួរសុខទុក្ខពីសំណាក់ ឯកឧត្តមរដ្ឋមន្ត្រី វង សូត ជូនដល់អ្នកគ្រប់គ្រង ម៉ែដោះ និងក្មួយៗកុមារដែលកំពុងស្នាក់នៅក្នុងមណ្ឌល ព្រមទាំងបាននាំយកនូវអំណោយរបស់ ឯកឧត្តមរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ចែកជូនដល់មណ្ឌល និងកុមារកំព្រា រួមមាន អង្ករចំនួន១៤បេ សៀវភៅ ៣៥០ក្បាលប៊ិច ខៀវ ២០០ដើមប៊ិចក្រហម ២០០ដើម ខ្មៅដៃឈើ ២០០ដើម បន្ទាត់ ៣០០ គម្របសៀវភៅ ៣០០ កាតាបស្ពាយ ៨០ អាវ ៩០ និងទឹកក្រូច ៦កេស៕
