សម្ដេចតេជោ ហ៊ុន សែន៖ ចិនជាប្រទេសផ្តល់កម្ចីមួយដ៏គួរឲ្យគោរព ព្រោះចិនមិនដែលបង្គាប់បញ្ជាឲ្យកម្ពុជាធ្វើនេះ ឬធ្វើនោះ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ចិនជាប្រទេសផ្តល់កម្ចីមួយដ៏គួរឱ្យគោរព ព្រោះចិនមិនដែលបង្គាប់បញ្ជាឱ្យកម្ពុជាធ្វើនេះ ឬធ្វើនោះ ក្រោមកម្ចីរបស់គេនោះទេ ។
ក្នុងពិធីបើកការដ្ឋានស្តារ និងលើកកម្រិតគុណភាពផ្លូវជាតិលេខ៣១ និង៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាថ្ងៃទី៣០ ធ្នូនេះ សម្តេចតេជោ ហ៊ុន សែន បានចាត់ទុកថា ការកសាងឡើងវិញផ្លូវជាតិលេខ៣១ និង៣៣ ជាសមិទ្ធផលថ្មីមួយទៀត សម្រាប់បម្រើប្រយោជន៍ ជូនប្រជាពលរដ្ឋ ។
សម្តេចតេជោ មានប្រសាសន៍ថា ឆ្នាំ២០២២ ទំហំពាណិជ្ជកម្មកម្ពុជា-ចិន សម្រេចបានប្រមាណ ១៤ពាន់៥០០លានដុល្លារ កើនឡើងប្រមាណ ១៩ %។ សម្តេចតេជោ បង្ហាញក្តីរំពឹងថា ទំនិញ និងផលិតផលរបស់កម្ពុជាកាន់តែច្រើន នឹងបង្ហាញវត្តមានលើទីផ្សាររបស់ចិន ៕
