សម្ដេចតេជោ អរគុណសម្ដេច ស ខេង ដែលបានចុះទៅដឹកនាំប្រតិបត្តិការរុករក ជនរងគ្រោះក្នុងករណីភ្លើងឆេះកាស៊ីណូ នៅប៉ោយប៉ែត
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំណរគុណសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានចុះទៅដឹកនាំប្រតិបត្តិការរុករក និងសង្គ្រោះជនរងគ្រោះក្នុងករណី អគ្គិភ័យឆាបឆេះនៅកាស៊ីណូហ្គ្រេនដាយមិន នៅប៉ោយប៉ែត ។
ក្នុងពិធីបើកការដ្ឋានស្តារ និងលើកកម្រិតគុណភាពផ្លូវជាតិលេខ៣១ និង៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាថ្ងៃទី៣០ ធ្នូនេះ សម្តេចតេជោ ហ៊ុន សែន ចូលរួមរំលែកមរណទុក្ខយ៉ាងក្រៀមក្រំ ជាមួយជនរងគ្រោះក្នុងគ្រោះអគ្គីភ័យឆាបឆេះកាស៊ីណូ នៅប៉ោយប៉ែត ដែលបណ្តាលឲ្យមនុស្សស្លាប់ជិត ២០នាក់ និងរបួសជាង ១០០នាក់។
ជាមួយគ្នានោះសម្តេចតេជោ បានថ្លែងកោតសរសើរ ឧបនាយករដ្ឋមន្ត្រី កែ គឹមយ៉ាន និងឯឧត្ដម អ៊ុំ រាត្រី ដែលបានដឹកនាំប្រតិបត្តិការ ក្នុងករណីអគ្គីភ័យឆាបឆេះកាស៊ីណូនោះផងដែរ ។
សម្តេចតេជោ ក៏បានណែនាំឲ្យអាជ្ញាធរប្រញាប់រៀបចំ សណ្តាប់ធ្នាប់នៅកន្លែងឆេះ ដើម្បីសម្រួលដំណើរឆ្លងកាត់ ច្រកព្រំដែនប៉ោយប៉ែត ៕
