ឯកឧត្តម ងួន ប៊ៀន បានអញ្ជើញចូលរួមក្នុងពិធីបើកការដ្ឋានស្ដារ និងលើកកម្រិតគុណភាពផ្លូវជាតិលេខ៣១ និងផ្លូវលេខ៣៣

ភ្នំពេញ៖ ឯកឧត្តម ងួន ប៊ៀន តំណាងរាស្រ្តមណ្ឌលខេត្តកែប និងជាសមាជិកគណៈកម្មការទី៨ នៃរដ្ឋសភា នាព្រឹកថ្ងៃទី៣០ ខែធ្នូ ឆ្នាំ២០២២ បានអញ្ជើញចូលរួមក្នុងពិធីបើកការដ្ឋានស្ដារ និងលើកកម្រិតគុណភាពផ្លូវជាតិលេខ៣១ និងផ្លូវជាតិលេខ៣៣ ក្រោមអធិបតីភាពដ៏ខ្ពង់ខ្ពស់​ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី​ នៃព្រះរាជាណាចក្រកម្ពុជា និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា ស្ថិតនៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។

សូមបញ្ជាក់ថា ផ្លូវជាតិលេខ៣១ប្រវែងជិត៥៤គីឡូម៉ែត្រ ចាប់ពីផ្លូវបែកគុស​ (ចំណុចប្រសព្វផ្លូវជាតិលេខ៣) ដល់ទីរួមស្រុកកំពង់ត្រាច (ចំណុចតភ្ជាប់ផ្លូវលេខ៣៣) ដោយផ្លូវនេះត្រូវស្ដារ និងលើកកម្រិតគុណភាពជាប្រភេទផ្លូវក្រាលបេតុងកៅស៊ូ (AC) មានកម្រាស់ ៧សង់ទីម៉ែត្រ និងពង្រីកទទឹងតួផ្លូវរហូតដល់ ១២ម៉ែត្រ ។

ចំណែកផ្លូវជាតិលេខ៣៣មានប្រវែងជិត៥៣គីឡូម៉ែត្រ ចាប់ពីក្រុងកំពតដល់ច្រកលក (ព្រំដែនកម្ពុជា_ វៀតណាម) ដែលផ្លូវនេះនឹងត្រូវស្ដារ និងលើកកម្រិតគុណភាពជាប្រភេទផ្លូវ ក្រាលបេតុងកៅស៊ូ (AC) មានកម្រាស់ ៥សង់ទីម៉ែត្រ និងកម្រាស់ ៧សង់ទីម៉ែត្រ ព្រមទាំងពង្រីកទទឹងតួផ្លូវរហូតដល់ ១២ម៉ែត្រ ហើយផ្លូវទាំងពីរនេះគឺជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន ៕