ប្រតិភូរស្នងការដ្ឋាននគរបាលខេត្តមណ្ឌលគិរី និងខេត្តដាក់ឡាក់ បើកកិច្ចប្រជុំបូកសរុបលទ្ធផល កិច្ចសហប្រតិបត្តិការរក្សាសន្តិសុខ សណ្តាប់ធ្នាប់តាមតំបន់ព្រំដែន
ភ្នំពេញ៖ នាថ្ងៃទី៩ ខែមករា ឆ្នាំ២០២៣ គណៈប្រតិភូនៃស្នងការដ្ឋាននគរបាលខេត្តមណ្ឌលគិរី ដឹកនាំដោយ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ជាប្រធានសគណៈប្រតិភូ និង លោកឧត្តមសេនីយ៍ត្រី ឆាយ សុខា អនុប្រធាននាយកដ្ឋានទទួលបន្ទុកកិច្ចការព្រំដែន និង លោក លោកស្នងការរងចំនួន៥រូប រួមជាមួយបណ្ដាសមាជិកប្រតិភូសរុបចំនួន ២០រូប បានអញ្ជើញចូលរួមក្នុងកិច្ចប្រជុំបូកសរុបលទ្ធផលកិច្ចសហប្រតិបត្តិការរក្សាសន្តិសុខ សណ្ដាប់ធ្នាប់តាមតំបន់ព្រំដែន ប្រចាំឆ្នាំ២០២២ និងលើកទិសដៅសហប្រតិបត្តិការឆមាសទី១ ឆ្នាំ២០២៣ រវាងស្នងការដ្ឋាននគរបាលខេត្តមណ្ឌលគិរី(កម្ពុជា) ជាមួយស្នងការដ្ឋាននគរបាលខេត្តដាក់ឡាក់ ដឹកនាំដោយលោក វ៉ូ វ៉ាន់កាញ់ អនុប្រធានគណៈកម្មាធិការប្រជាជនខេត្តដាក់ឡាក់ និង លោកឧត្តមសេនីយ៍ត្រី ឡេ វីញគ្វី ស្នងការនគរបាលខេត្ត ជាប្រធានប្រតិភូ នៃស្នងការដ្ឋាននគរបាលខេត្តដាក់ឡាក់សធារណរដ្ឋសង្គមនិយមវៀតណាម។
កិច្ចប្រជុំនេះបានប្រព្រត្តិឡើងនៅសាលប្រជុំ នៃស្នងការដ្ឋាននគរបាលខេត្តដាក់ឡាក់ នៃសាធារណរដ្ឋសង្គមនិយមវៀតណាម។
ក្នុងកិច្ចប្រជុំនាឱកាសនោះផងដែរលោក ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានមានសុន្ទរកថាស្វាគមន៍ ស្តីពីកិច្ចសហប្រត្តិការការពារសន្តិសុខ សណ្តាប់ធ្នាប់នៅតាមតំបន់ព្រំដែនរវាងខេត្តទាំងពីរ(មណ្ឌលគិរី កម្ពុជា-ដាក់ឡាក់ វៀតណាម) និងបានលើកឡើងពីបញ្ហាប្រឈមមួយចំនួន ដែលជាបញ្ហាដ៏គួរឲ្យព្រួយបារម្មណ៍ខ្ពស់បំផុត រវាងប្រទេសទាំងពីរ និយាយដោយឡែក រវាងខេត្តទាំងពីរ និយាយជារួម។
+ទី១ ការជួញដូរចែកចាយគ្រឿងញៀនឆ្លងដែនខុសច្បាប់
+ទី២ អំពើជួញដូរមនុស្សតាមគ្រប់ទម្រង់
+ទី៣ បទល្មើសបច្ចេកវិទ្យា ពិសេសបទល្មើស តាមប្រព័ន្ធអនឡាញ
+ទី៤ ការធ្វើអន្តោប្រវេសន៍ឆ្លងដែនខុសច្បាប់ ។
លោកឧត្តមសេនីយ៍ស្នងការក៏បានសំណូមពរដល់ភាគីវៀតណាម និង ភាគីកម្ពុជា បង្កើនកិច្ចសហការល្អជាមួយគ្នាក្នុងការបង្ការ ទប់ស្កាត់នឹងបទល្មើសទាំងនេះឲ្យបានជិតស្និទ្ធនិងស្រាវជ្រាវស្វែងរកចាប់ខ្លួននូវមុខសញ្ញាប្រព្រឹត្តល្មើសឲ្យខាងតែបានដើម្បីផ្តន្ទាទោសទៅតាមច្បាប់នៃប្រទេសទាំងពីរ។
ក្នុងជំនួបគ្នានោះផងដែរលោកឧត្តមសេនីយ៍ត្រី ឡេ វីញគ្វី ប្រធានគណៈប្រតិភូស្នងការដ្ឋាននគរបាលខេត្តដាក់ឡាក់ នៃសាធារណរដ្ឋសង្គមនិយមវៀតណាម និង លោកឧត្តមសេនីយ៍ទោ ឡោ សុខា ប្រធានគណៈប្រតិភូ នៃស្នងការដ្ឋាននគរបាលខេត្តមណ្ឌលគិរី នៃព្រះរាជាណាចក្រកម្ពុជា បានឯកភាពទាំងស្រុង និងវាយតម្លៃខ្ពស់លើលទ្ធផលនៃកិច្ចប្រជុំនាថ្ងៃនេះ។ ហើយកិច្ចប្រជុំនាថ្ងៃនេះ ជាការដកបទពិសោធន៍ដ៏មានសារសំខាន់រវាងកងកម្លាំងនគរបាល នៃ ខេត្តទាំងពីរក្នុងកិច្ចសហការរក្សាសន្តិសុខ សណ្តាប់ធ្នាប់តាមតំបន់ព្រំដែន កម្ពុជា-វៀតណាម។
មុននឹងបញ្ចប់ ភាគីទាំងពីរ (កម្ពុជា -វៀតណាម) បានចុះហត្ថលេខាលើកំណត់ហេតុនៃកិច្ចប្រជុំ និងបានជូនជាកាដូរវត្ថុអនុស្សាវរីយ៍រវាងភាគីទាំងពីរទៅវិញទៅមក ស្ថិតក្នុងបរិយាកាសរីករាយ ស្និទ្ធស្នាលជាទីបំផុតដើម្បីរិតចំណងសាមគ្គីភាព មិត្តភាព និងកិច្ចសហប្រតិបត្តិការល្អ រវាងកងកម្លាំងនគរបាលនៃខេត្តទាំងពីរ ៕
