ឯកឧត្តមវេជ្ជបណ្ឌិត សុះ មុះសិន អញ្ជើញចុះជួបសំណេះសំណាលជាមួយក្រុមគ្រូពេទ្យ និងនិស្សិតផ្នែកវិទ្យាសាស្រ្តសុខាភិបាលមុស្លិមកម្ពុជា

ភ្នំពេញ៖ ឯកឧត្តមវេជ្ជបណ្ឌិត សុះ មុះសិន តំណាងរាស្ត្រមណ្ឌលខេត្តកណ្ដាល និងជាសមាជិកគណៈកម្មការទី៨ នៃរដ្ឋសភា បានអញ្ជើញជាអធិបតីក្នុងពិធីសំណេះសំណាល និងជួបជុំក្រុមគ្រូពេទ្យ និងក្រុមនិស្សិតផ្នែកវិទ្យាសាស្រ្តសុខាភិបាលមុស្លិមកម្ពុជា លើកទី១ ឆ្នាំ២០២៣ ក្រោមប្រធានបទ «សុខភាព និងសហគមន៍ឥស្លាម» នៅមជ្ឈមណ្ឌល CJCC រាជធានីភ្នំពេញ កាលពីរសៀលថ្ងៃទី០៨ ខែមករា ឆ្នាំ២០២៣។

ពិធីនេះមានការអញ្ជើញចូលរួមពី ឯកឧត្តម លី ស៊ុគ្រី តំណាងរាស្រ្តមណ្ឌលខេត្តតាកែវ ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ លោកគ្រូ អ្នកគ្រូ ជាវេជ្ជបណ្ឌិត ក្រុមគ្រូពេទ្យស្ម័គ្រចិត្ត និស្សិតផ្នែកវិទ្យាសាស្រ្តសុខាភិបាលតាមបណ្តាសាកលវិទ្យាល័យនានា យុវជន សិស្ស និស្សិត ក្រុមការងារសមាគមគ្រូពេទ្យអ៊ីស្លាមកម្ពុជា រាជធានី ខេត្ត និងក្រុមការងារសមាគមនិស្សិតមុស្លិមកម្ពុជារាជធានីភ្នំពេញផងដែរ។

ក្នុងឱកាសនោះ ឯកឧត្តមវេជ្ជបណ្ឌិត សុះ មុះសិន បានលើកទឹកចិត្ត និងលើកឡើងពីការយកចិត្តទុកដាក់ពីសំណាក់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា វិស័យសុខាភិបាលក៏ត្រូវបានលើកម្ពស់ពីមួយជំហានទៅមួយជំហានទាំងសេវាពិនិត្យព្យាបាល និងផ្តល់ជាថ្នាំលេបជូនដល់ប្រជាពលរដ្ឋក្រីក្រនៅតាមមូលដ្ឋាន និងសហគមន៍នានាទូទាំងប្រទេស។

ឯកឧត្តមបានបន្តថា វិស័យសុខាភិបាលគឺជាផ្នែកមួយយ៉ាងសំខាន់ពីព្រោះវិស័យនេះកំពុងតែមានការរីកចំរើនយ៉ាងខ្លាំងក្លាមិនត្រឹមតែក្នុងប្រទេសកម្ពុជាប៉ុណ្ណោះទេ គឺទូទាំងសាកលលោក។ ឯកឧត្តមបានបន្ថែមថា ការជួបជុំក្រុមគ្រូពេទ្យ និងនិស្សិតផ្នែកវិទ្យាសាស្រ្តសុខាភិបាលមុស្លិមកម្ពុជាទូទាំងប្រទេស ដើម្បីប្រមូលកម្លាំងសាមគ្គីក្នុងការរួមចំណែកលើកកម្ពស់ការថែទាំសុខភាពរបស់សហគមន៍ ការជួយសង្រ្គោះផ្សេងៗតាមមូលដ្ឋានសហគមន៍ ដើម្បីអភិវឌ្ឍន៍សហគមន៍របស់យើងឱ្យមានការរីកចម្រើន និងជម្រុញធនធានមនុស្ស នៅក្នុងនោះគឺវិស័យសុខាភិបាល មានការផ្លាស់ប្ដូរនូវឥរិយាបទ ដើម្បីឱ្យប្រជាពលរដ្ឋនៅក្នុងសហគមន៍ ក៏ដូចជាទូទាំងប្រទេសឱ្យមានការយល់ដឹងពីផ្នែកសុខាភិបាល ពេលដែលមានបញ្ហាសុខភាពគឺត្រូវទៅពិនិត្យ ឬពិគ្រោះយោបល់ជាមួយគ្រូពេទ្យ ឬអ្នកជំនាញផ្នែកសុខភាព ជៀសវាងការទិញថ្នាំពេទ្យខុសធ្វើឱ្យប៉ះពាល់ដល់សុខភាពរបស់ពួកគាត់។

ឯកឧត្តមបានបន្ថែមថា ធនធានមនុស្សគឺជាបញ្ហាសំខាន់លើការអភិវឌ្ឍ លើផ្នែកវិទ្យាសាស្ដ្រសុខាភិបាល លើផ្នែកសំខាន់ផ្សេងៗ សុខភាពរបស់មនុស្សគឺមានការប្រែប្រួល ដូចនេះគឺទាមទារឱ្យយើងមានការអភិវឌ្ឍលើផ្នែកសុខាភិបាល ការអភិវឌ្ឍធនធានមនុស្សឱ្យមានជំនាញលើផ្នែកវិទ្យាសាស្ដ្រសុខាភិបាល ៕