ឯកឧត្តម ឈាង វុន អញ្ជើញជួបសំណេះសំណាលជាមួយលោកគ្រូ អ្នកគ្រូមតេ្តយ្យសាលា សិស្សានុសិស្ស និងប្រជាពលរដ្ឋ នៅសង្កាត់អូរចារ ក្រុងបាត់ដំបង ខេត្តបាត់ដំបង

ភ្នំពេញ៖ ឯកឧត្តម ឈាង វុន ប្រធានគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និងជាអ្នកតំណាងរាស្រ្តមណ្ឌលខេត្តបាត់ដំបង ឯកឧត្តម ច័ន្ទ សុផល អនុប្រធានគណៈកម្មការ មហាផ្ទៃ ការពារជាតិ និងមុខងារសាធារណៈ នៃរដ្ឋសភា និងជាអ្នកតំណាងរាស្រ្តមណ្ឌលខេត្តបាត់ដំបង ឯកឧត្តម នេត មុន្នី ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ នៃក្រសួងសេដ្ឋកិច្ច និងហិរញ្ញវត្ថុ ឯកឧត្តម ផាត់ ពៅស៊ាង អនុប្រធានក្រុមប្រឹក្សាអ្នកច្បាប់រដ្ឋសភា លោកជំទាវ ញ៉ឹក សុគន្ធ សមាជិកក្រុមប្រឹក្សាខេត្ត អាជ្ញាធរសង្កាត់ព្រមទាំងមន្រ្តីអគ្គលេខាធិការដ្ឋានរដ្ឋសភា នាព្រឹកថ្ងៃទី១៣ ខែមករា ឆ្នាំ២០២៣ បានអញ្ជើញជួបសំណេះសំណាលជាមួយលោកគ្រូ អ្នកគ្រូមតេ្តយ្យសាលា សិស្សានុសិស្ស និងប្រជាពលរដ្ឋជាង៣០០នាក់ នៅសង្កាត់អូរចារ ក្រុងបាត់ដំបង ខេត្តបាត់ដំបង។

ឯកឧត្តម ឈាង វុន បានមានប្រសាសន៍ថា ការជួបសំណេះសំណាលនាពេលនេះ ឯកឧត្តមចង់ជម្រាបជូនពីការគ្រប់គ្រងទ្រព្យសម្បត្តិរដ្ឋ ដែលកន្លងទៅសាលាមតេ្តយ្យសង្កាត់អូរចារត្រូវ បានជនមានទ្រព្យសម្បត្តិ បានរំលោភយកធ្វើជាកម្មសិទ្ធផ្ទាល់ខ្លួនតែដោយមានការប្តឹងផ្តល់ពីប្រជាពលរដ្ឋ និងលោកគ្រូ អ្នកគ្រូ សាលាមតេ្តយ្យសង្កាត់អូរចារមក ឯកឧត្តម ឈាង វុន អ្នកតំណាងរាស្រ្តមណ្ឌលខេត្តបាត់ដំបង ឯកឧត្តមបានធ្វើការប្តឹងទៅតុលាការខេត្តបាត់ដំបងរហូតទទួលបានយុតិ្តធម៌ពីតុលាការគ្រប់ជាន់ថ្នាក់របស់ខេត្ត បានប្រគល់សាលាមត្តេយ្យសង្កាត់អូរចារមកអោយសាលាមតេ្តយ្យសង្កាត់អូចារវិញ។​ ដោយមើលឃើញពីការកើនឡើងនៅកុមារដែលជាកូនចៅប្រជាពលរដ្ឋក្នុងសង្កាត់អូរចារ ឯកឧត្តមបានស្នើទៅស្ថាប័នពាក់ពន្ធ័ និងអង្គការជាតិ អន្តរជាតិ និងស្ថានទូតជប៉ុនដើម្បីរកថវិកាជួយកសាងអគារសិក្សាបន្ថែម និងមណ្ឌលកំសាន្តជូនកុមារតូចៗផងដែរ។

ដោយឡែកក្នុងឱកាសនោះ ឯកឧត្តម នេត មុន្នី និងឯកឧត្តម ផាត់ ពៅស៊ាង បានពន្យល់លោកគ្រូ អ្នកគ្រូ និងប្រជាពលរដ្ឋសង្កាត់អូរចារអោយយល់ពីសារៈសំខាន់នៃសាលាមតេ្តយ្យអូរចារដែលជាទ្រព្យសម្បត្តិរដ្ឋហើយមិនអាចជនណា​ ឬបុគ្គលណារំលោភយកបានឡើយ​ ហើយត្រូវចេះជួយការពារដើម្បីទុកជាប្រយោជន៍សហគមន៍បម្រើជូនដល់កូនចៅប្រជាពលរដ្ឋ។

ឯកឧត្តម ឈាង វុន បានថ្លែងអំណរគុណដល់វាគ្មិនទាំងពីរបានពន្យល់យ៉ាងក្បោះក្បាយពីការគ្រប់គ្រងទ្រព្យសម្បត្តិរដ្ឋជូនដល់ប្រជាពលរដ្ឋ និងលោកគ្រូ អ្នកគ្រូសង្កាត់អូរចារ។​ ទន្ទឹមនឹងនោះគណៈប្រតិភូដឹកនាំដោយ​ ឯកឧត្តម ឈាង វុន បានចុះពិនិត្យទីតាំងដាក់លូដើម្បីដោះស្រាយកាលិចទឹករបស់ប្រជាពលរដ្ឋសង្កាត់អូរចារនៅរដូវវស្សា។​ បន្ទាប់មកគណៈប្រតិភូបានចែកជូនសៀវភៅ ប៊ិច ដល់លោកគ្រូ អ្នកគ្រូ និងសិស្សានុសិស្សផងដែរ​ ៕