គ្រួសារសពស្លាប់ដោយឆក់ចរន្តអគ្គិសនី នៅខេត្តកំពង់ស្ពឺ ទទួលបានការចូលរួមរំលែកទុក្ខពីកាកបាទក្រហមកម្ពុជា
ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី ១៣ ខែមករា ឆ្នាំ២០២៣នេះ បានចាត់ឱ្យឯកឧត្តមវេជ្ជ. អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា និងសហការី រួមជាមួយថ្នាក់សាខា អនុសាខា អញ្ជើញចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសពចំនួន៣នាក់ (ប្តី ប្រពន្ធ និងកូនស្រី) ដែលស្លាប់ដោយឆក់ចរន្តអគ្គិសនី ខណៈពេលដែលប្រពន្ធងូតទឹករួចដើរទៅក្រោមដើមស្វាយក៏ប៉ះជាមួយព្រីភ្លើងឆក់រួចកូនស្រីឃើញម្តាយឆក់ក៏រត់ទៅជួយក៏ឆក់តាម ក្រោយមកឪពុកឃើញប្រពន្ធនិងកូនឆក់ក៏ស្ទុះទៅជួយតែមិនបានសម្រេចក៏ឆក់ស្លាប់ទាំង៣រូបតែម្តង កាលពីថ្ងៃទី១១ ខែមករា ឆ្នាំ២០២៣ ស្ថិតនៅភូមិកំណប់ ឃុំ រលាំងគ្រើល ស្រុកសំរោងទង ខេត្តកំពង់ស្ពឺ។
សូមបញ្ជាក់ថាក្រុមគ្រួសារសព ខាងលើមានសមាជិកក្នុងគ្រួសារសរុប៦នាក់រួមមាន៖
១-ប៊ុត វិទ្ធី ភេទប្រុស អាយុ ៤២ឆ្នាំ មុខរបស់កម្មករការដ្ឋានខ្សាច់ ត្រូវជាឪពុក (ស្លាប់)
២-ជីប សិខុន ភេទស្រី អាយុ ៤១ឆ្នាំ កម្មករការដ្ឋានខ្សាច់ ត្រូវជាម្តាយ (ស្លាប់)
៣- សេង សិខវង្ស ភេទប្រុស អាយុ ១៩ឆ្នាំ មុខរបរ បើកឡាន កូនទី១
៤- សេង គឹមឡុង ភេទប្រុស អាយុ ១៥ឆ្នាំ មុខរបរ កម្មករការដ្ឋានខ្សាច់ កូនទី២
៥- សេង សុខធីញ ភេទស្រី ១០ឆ្នាំ សិស្ស កូនទី៣ (ស្លាប់)
៦- សេង សិលា ភេទប្រុស អាយុ ៨ឆ្នាំ សិស្ស កូនទី៤ (រងរបួសពេលទៅជួយម្តាយ)។
ស្ថិតក្នុងសមានទុក្ខដ៏ក្រៀមក្រំបំផុត ឯកឧត្តមវេជ្ជ. បានពាំនាំនូវការចូលរួមរំលែកទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមចូលរួមរំលែកទុក្ខដ៏ក្រៀមក្រំជាទីបំផុតនេះ ចំពោះមរណភាព របស់សព (ប្តី ប្រពន្ធ និងកូនស្រី) ខាងលើ គឺជាការបាត់បង់នូវ កូនស្រី កូនប្រុស ចៅស្រី និងជាការបាត់បង់ ឪពុក ម្តាយ ប្អូនស្រី បងស្រី ជាទីស្រឡាញ់បំផុតរបស់កូនៗ ដែលក្នុងមួយជីវិត តែងតែប្រកាន់ខ្ជាប់ នូវសីលធម៌ គុណធម៌ដ៏ល្អប្រពៃ តស៊ូប្រឹងប្រែង រកស៊ីចិញ្ចឹមបីបាច់ថែរក្សាកូន អប់រំផ្តល់ដំបូន្មានដល់កូនៗឱ្យមានអនាគតល្អ។
ទន្ទឹមនឹងនោះ ឯកឧត្តមវេជ្ជ. បានណែនាំដល់បងប្អូនទាំងអស់ សូមយកចិត្តទុកដាក់ និងប្រុងប្រយ័ត្នខ្ពស់ចំពោះគ្រោះមហន្តរាយផ្សេងៗ ដែលអាចបណ្តាលឱ្យគ្រោះថ្នាក់ដល់អាយុជីវិត រួមមាន គ្រោះអគ្គីភ័យ គ្រោះថ្នាក់ដោយចរន្តអគ្គិសនី គ្រោះថ្នាក់ចរាចរណ៍ជាដើម។ និងសូមឱ្យចៅៗ ទាំងអស់ជៀសឆ្ងាយពីគ្រឿងញៀន កុំបាក់ទឹកចិត្ត ខិតខំរៀនសូត្រ ដើម្បីក្លាយជាធនធានមនុស្សដ៏ល្អសម្រាប់សង្គមជាតិ។
ជាមួយគ្នានេះ កាកបាទក្រហមកម្ពុជា សូមឧទ្ទិសបួងសួងជូនដួងវិញ្ញាណក្ខន្ធសព (ប្តី ប្រពន្ធ និងកូនស្រី) ខាងលើបានទៅកាន់សុគតិភពកុំបីឃ្លៀងឃ្លាតឡើយ។
សម្ភារៈយកទៅចូលរួមរំលែកទុក្ខរួមមាន៖ អង្ករ ១០០គីឡូក្រាម,មី ៥កេស,ត្រីខ ៥០កំប៉ុង, ទឹកក្រូច ៥កេស និងថវិកាក្នុងមួយសព ៥លានរៀល សរុបទាំងបីសព ចំនួន១៥លានរៀលផងដែរ៕
