សម្តេចពិជ័យសេនា កោតសរសើរចំពោះកិច្ចខិតខំរបស់ គណៈកម្មការសន្តិសុខ ដែលសហការជាមួយគណៈកម្មាធិការជាតិ CAMSOC រៀបចំផែនការការពារព្រឹត្តិការណ៍កីឡាស៉ីហ្គេមលើកទី៣២

ភ្នំពេញ​៖​ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC បានវាយតម្លៃចំពោះកិច្ចខិតខំប្រឹងប្រែងរបស់គណៈកម្មការសន្តិសុខសណ្តាប់ធ្នាប់ដឹកនាំដោយ នាយឧត្តមសេនីយ៍ សន្តិបណ្ឌិត នេត សាវឿន ដែលបានសហការជាមួយគណៈកម្មការពាក់ព័ន្ធ នៃគណៈកម្មាធិការជាតិ CAMSOC យកចិត្តទុកដាក់រៀបចំផែនការពារ មធ្យោបាយសរុប និងសហការយ៉ាងជិតស្និទ្ធជាមួយក្រសួង ស្ថាប័នពាក់ព័ន្ធ ពិសេសសហប្រតិបត្តិការល្អជាមួយប្រទេសជាមិត្ត ដៃគូនានានាំមកនូវការគាំទ្រ និងជំនួយឧបត្ថម្ភយ៉ាងច្រើនសម្រាប់ពង្រឹងសមត្ថភាពដល់កងរក្សាការពារសុវត្ថិភាព សន្តិសុខ សណ្តាប់ធ្នាប់ក្នុងព្រឹត្តិការណ៍កីឡា SEA Games-ASEAN Para Games 2023 នាពេលខាងមុខ។

ការវាយតម្លៃបែបនេះរបស់ សម្តេចពិជ័យសេនា ទៀ បាញ់ បានធ្វើឡើងនៅព្រឹកថ្ងៃទី១៩ ខែមករា ឆ្នាំ២០២៣នេះ ក្នុងឱកាសសម្តេចបានអញ្ជើញត្រួតពិនិត្យ និងសំណេះសំណាលកងកម្លាំង នៃគណៈកម្មការសន្ដិសុខ និងសណ្ដាប់ធ្នាប់ចំនួន ៤,៣៧៤នាក់ ដើម្បីត្រៀមបម្រើការងារ និងផ្ដល់សុវត្ថិភាពជូនប្រតិភូកីឡាករ ភ្ញៀវជាតិ-អន្ដរជាតិ ក្នុងព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជា នាពេលឆាប់ៗខាងមុខ។

សម្តេចពិជ័យសេនា ទៀ បាញ់ បានថ្លែងថា សមិទ្ធផលការងារដែលសម្រេចបាននាពេលនេះ គឺជាស្មារតីទទួលខុសត្រូវខ្ពស់របស់គណៈកម្មការសន្តិសុខ សណ្តាប់ធ្នាប់ ដោយមានការចូលរួមគាំទ្រ និងសហការយ៉ាងជិតស្និទ្ធពីសំណាក់រដ្ឋបាលរាជធានី ខេត្ត និងសមត្ថកិច្ចពាក់ព័ន្ធ ដែលបង្ហាញពីទឹកចិ “កម្ពុជាប្រទេសតូច តែមានបេះដូងធំៗ ជាមួយនឹងភាពជឿជាក់ និងជោគជ័យគ្រប់កម្មវិធី វេទិកា កិច្ចប្រជុំអន្តរជាតិធំៗ កម្លាំងការពារសន្តិសុខ សណ្តាប់ធ្នាប់ពិតជាមានស្នាដៃ ទេពកោសល្យប៉ិនប្រសព្វ បទពិសោធន៍ ប្រកបដោយការទទួលខុសត្រូវខ្ពស់បានលើកមុខមាត់កេរ្តិ៍ឈ្មោះប្រទេសជាតិលេចត្រដែតលើឆាកអន្តរជាតិ។

ឆ្លៀតក្នុងឱកាសនោះដែរ សម្តេចពិជ័យសេនា ទៀ បាញ់ ក៏បានរំឮកថា នៅឆ្នាំ២០២២ កន្លងទៅថ្មីៗនេះ រាជរដ្ឋាភិបាលបានថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ និងសុខសុវត្ថិភាពសង្គមបានរឹងមាំធ្វើឱ្យបរាជ័យឧបាយកលទុច្ចរិតរបស់ពួកប្រឆាំងជ្រុលនិយម និងមជ្ឈដ្ឋានអគតិនានា ដែលបានប្រើប្រាស់ចលនាបដិវត្តន៍ពណ៌ ប៉ុនប៉ងផ្តួលរំលំរាជរដ្ឋាភិបាលស្របច្បាប់ ការពារសង្គមជាតិមិនឱ្យធ្លាក់ក្នុងអស្ថិរភាព អសន្តិសុខ ការបែកបាក់ជាតិ និងសង្គ្រាមសារជាថ្មីទៀត ធ្វើឱ្យសង្គមជាតិបន្តដំណើរទៅមុខឥតឈប់លើមាគ៌ាសន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍។

សម្តេចពិជ័យសេនា ទៀ បាញ់ បានឱ្យដឹងថា គិតត្រឹមថ្ងៃទី១៩ ខែមករា ឆ្នាំ២០២៣នេះ ព្រឹត្តិការណ៍ប្រកួតកីឡា SEA Games នៅសល់តែ១០៦ថ្ងៃទៀតតែប៉ុណ្ណោះ។ តាមរយៈពេលវេលាសេសសល់នាថ្ងៃនេះ និងមុនការរាប់ថយក្រោយ ១០០ថ្ងៃ គណៈកម្មាធិការជាតិ CAMSOC ចង់បង្ហាញ និងផ្សព្វផ្សាយឱ្យមតិសាធារណជាតិ និងអន្តរជាតិបានជ្រាបថា កម្ពុជាត្រៀមខ្លួនរួចជាស្រេចក្នុងការធ្វើម្ចាស់ផ្ទះរៀបចំការប្រកួតកីឡា SEA Games-ASEAN Para_Games តាមរយៈការត្រៀមកម្លាំង មធ្យោបាយ ឧបករណ៍សម្ភារៈគ្រប់ប្រភេទ សម្រាប់ធានានូវសុខសុវត្ថិភាព និងភាពកក់ក្តៅជូនដល់ប្រតិភូកីឡា ប្រមុខរដ្ឋ ប្រមុខរដ្ឋាភិបាលទាំង ១១ប្រទេស មន្ដ្រីកីឡាអន្តរជាតិ មកពីជុំវិញពិភពលោក ថ្នាក់ដឹកនាំចលនាអូឡាំពិកពិភពលោក និងអ្នកគាំទទេសចរណ៍រាប់ម៉ឺននាក់ មកចូលរួមនៅកម្ពុជា ដែលកំពុងរស់នៅក្រោមម្លប់ដ៏ត្រជាក់នៃសន្តិភាព និងការអភិវឌ្ឍប្រទេសជាតិលើគ្រប់វិស័យឥតឈប់ឈរ។

ក្នុងនាមថ្នាក់ដឹកនាំ CAMSOC សម្តេចពិជ័យសេនា ទៀ បាញ់ សូមក្រើនរំឮកដល់គណៈកម្មការជំនាញពាក់ព័ន្ធ ប្តេជ្ញាចិត្តគោរពយ៉ាងម៉ឺងម៉ាត់នូវអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលបានថ្លែងក្នុងពិធីបិទព្រឹត្តិការណ៍កីឡាជាតិលើកទី៣ និងកីឡាជាតិជនពិការលើកទី១ កាលពីថ្ងៃទី៣០ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ និងពិធីជួបជុំលើកទី៥ ជាមួយអ្នកសារព័ត៌មាន កាលពីថ្ងៃទី១៤ ខែមករា ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ នាពេលថ្មីៗនេះ។

នាឱកាសនោះដែរ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មការសន្តិសុខ សណ្តាបធ្នាប់ បានបង្ហាញពីការងារត្រៀមរៀបចំប្រុងប្រៀបគ្រប់ផ្នែកទាំងកម្លាំង មធ្យោបាយ ឧបករណ៍ សម្ភារៈគ្រប់ប្រភេទសម្រាប់ផ្តល់សុវត្ថិភាព សន្តិសុខ សណ្តាប់ធ្នាប់ក្នុងព្រឹិត្តិការណ៍ប្រកួតកីឡា ស៉ីហ្គេមលើកទី៣២ និងអាស៊ានប៉ារ៉ាហ្គេម២០២៣ នាពេលខាងមុខ ឱ្យប្រព្រឹត្តទៅទទួលបានជោគជ័យតាមការប្រគល់ភារកិច្ចរបស់រាជរដ្ឋាភិបាល។

សូមបញ្ជាក់ថា កម្ពុជានឹងធ្វើជាម្ចាស់ផ្ទះលើកដំបូងនៃការប្រកួតកីឡាអាស៊ីអាគ្នេយ៍ ឬស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នៅថ្ងៃទី០៥ ខែឧសភា ឆ្នាំ២០២៣៕