ឧត្ដមសេនីយ៍ឯក ហ៊ុន ម៉ាណែត និងលោកជំទាវ ផ្ដល់អំណោយដល់គ្រួសារ អតីតយុទ្ធជនពិការ ដែលរងគ្រោះដោយជំនន់ទឹកភ្លៀង ក្នុងស្រុកសាមគ្គីមានជ័យ
ភ្នំពេញ៖ ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត នៅថ្ងៃទី១៩ ខែមករា ឆ្នាំ២០២៣ បានដឹកនាំក្រុមការងារមនុស្សធម៌ និងក្រុមការងារយោធិននារីរបស់អង្គភាព សហការជាមួយអាជ្ញាធរស្រុកសាមគ្គីមានជ័យ កងកម្លាំងទាំង៣ប្រភេទ នាំយកអង្ករចំនួន ៧៥០គីឡូក្រាម ស៊ីម៉ង់ត៍ ៣០បេ ស័ង្កសី ៣០០សន្លឹក មី១៥កេស ទឹកត្រី១៥យួរ ទឹកស៊ីអ៉ីវ១៥យួរ ត្រីខ១៥យួរ មុង១៥ ជែល១៥ដប រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ឧបត្ថម្ភដល់សមាជិកសមាគមអតីតយុទ្ធជនដែលរងគ្រោះដោយជំនន់ទឹកភ្លៀងចំនួន ១៥គ្រួសារក្នុងស្រុកសាមគ្គីមានជ័យ ។
ស្ថិតក្នុងឱកាសនេះ មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់ ឯកឧត្តម មេបញ្ជាការ កងទ័ពជើងគោក និងលោកជំទាវ ព្រមទាំងបានបន្តថា ឯកឧត្តម មេបញ្ជាការ កងទ័ពជើងគោក និងលោកជំទាវ តែងតែគិតគូរពីសុខទុក្ខរបស់បងប្អូនអតីតយុទ្ធជន ទីណាមានបងប្អូនអតីតយុទ្ធជនជួបការលំបាក ឯកឧត្តម និងលោកជំទាវ តែងតែចាត់ចែងក្រុមការងារចុះទៅជួយឧបត្ថម្ភជានិច្ច ។
ឧត្តមសេនីយ៍ត្រី អ៊ុំ សុភា បានបញ្ជាក់ទៀតថា បើគ្មានបងប្អូនអតីតយុទ្ធជន ចូលរួមលះបង់សាច់ស្រស់ឈាមស្រស់ ជាមួយសម្តេចតេជោ នាយករដ្ឋមន្ត្រី តស៊ូប្រយុទ្ធដើម្បីរំដោះជាតិពីរបបប្រល័យពូជសាសន៍ ប៉ុល ពត ទេ ប្រទេសកម្ពុជាក៏ពុំមានសុខសន្តិភាពដូចសព្វថ្ងៃនេះដែរ ។
ក្រុមគ្រួសារបងប្អូនអតីតយុទ្ធជនទាំង១៥គ្រួសារ បានគោរពថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ហ៊ុន ម៉ាណែត និងលោកជំទាវ ព្រមទាំង លោកមេបញ្ជាការ តំបន់ប្រតិបត្តិការសឹករងខេត្ត និងក្រុមការងារដែលបានយកចិត្ដទុកដាក់គិតគូរអំពីសុខទុក្ខរបស់អតីតយុទ្ធជន និងប្រជាពលរដ្ឋ ដែលជួបការលំបាក និងសូមគោរពជូនពរ ឯកឧត្តម លោកជំទាវ និងក្រុមការងារ សូមមានសុខភាពល្អ ប្រកបបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
