នាយឧត្តមសេនីយ៍ គៀត ច័ន្ទថារិទ្ធ ទទួលស្វាគមន៍ ឯកឧត្ដម Damien Kilner នាយកប្រចាំតំបន់មេគង្គ ប្រទេសអូស្ត្រាលី ចូលជួបសម្ដែងការគួរសម និងពិភាក្សាការងារ

ភ្នំពេញ៖ ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ នារសៀលថ្ងៃចន្ទ ៩ កើត ខែមាឃ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៣០ ខែមករា ឆ្នាំ២០២៣នេះ បានទទួលស្វាគមន៍ ឯកឧត្ដម Damien Kilner នាយកប្រចាំតំបន់មេគង្គ ប្រទេសអូស្ត្រាលី និងប្រតិភូចូលជួបសម្ដែងការគួរសម និងពិភាក្សាការងារ នៅអគ្គនាយកដ្ឋានអន្តោប្រវេសន៍។

ជំនួបពិភាក្សានេះក៍មានអញ្ជើចូលរួមពីឯកឧត្តម អគ្គនាយករង លោក-លោកស្រីអនុប្រធាននាយកដ្ឋានពាក់ព័ន្ធ។

ក្នុងកិច្ចជំនួបនេះផងដែរ ឯកឧត្តម នាយឧត្តមសេនីយ៍ អគ្គនាយក បានធ្វើការវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមក និងពិភាក្សាសំខាន់ផ្តោតទៅលើទំនាក់ទងកិច្ចសហប្រតិបត្តិការ និងការជួយគាំទ្រគ្នាទៅវិញទៅមកលើការកសាងសមត្ថភាពមន្រ្តីអនុវត្តច្បាប់ ដើម្បីរួមគ្នាឈានទៅប្រយុទ្ធប្រឆាំង និងទប់ស្កាត់បទល្មើសឆ្លងដែនគ្រប់ប្រភេទ។

ឯកឧត្ដម Damien Kilner បានធ្វើការថ្លែងអំណរគុណ និងធ្វើការកោតសរសើចំពោះការសហការដែលអគ្គនាយកដ្ឋានអន្តោប្រវសន៍បានចូលរួមចំណែកកន្លងមក។

ជាកិច្ចបញ្ចប់ ឯកឧត្តម នាយឧត្តមសេនីយ៍ អគ្គនាយក បានធ្វើការថ្លែងអំណរគុណចំពោះកិច្ចសហប្រតិបត្តិការកន្លងមក និងសង្ឃឹមថាអង្គភាពទាំងពីរបន្តកិច្ចសហប្រតិបត្តិការឱ្យកាន់តែប្រសើរឡើង ៕