កងកម្លាំង និងគ្រួសារយោធិន គោរពថ្លែងអំណរគុណសម្តេចតេជោ ហ៊ុន សែន ដែលបានផ្ដល់វ៉ាក់សាំងការពារជំងឺកូវីដ-១៩ ដូសទី៦
ភ្នំពេញ៖ ក្រុមកាងារចាក់វ៉ាក់សាំងរបស់កងការពារព្រំដែនគោកលេខ៤០៣ នាថ្ងៃទី៣១ ខែមករា ឆ្នាំ២០២៣ បានបិទបញ្ចប់យុទ្ធនាការ ចាក់វ៉ាក់សាំងការពារជំងឺកូវីដ-១៩ ដូសទី៦ ជូនយោធិន គ្រួសារយោធិន និងកងកម្លាំងនគរបាលការពារព្រំដែនគោក ក្រោមវត្តមាន លោកវរសេនីយ៍ឯក ជឹម សំអោ មេបញ្ជាការ កងការពារព្រំដែនគោកលេខ៤០៣ ប្រធានក្រុមការងារចាក់វ៉ាក់សាំងកូវីដ-១៩។
គួរបញ្ជាក់ថាក្នុងយុទ្ធនាការចាក់វ៉ាក់សាំងការពារជំងឺកូវីដ-១៩ ដូសទី៦ ជូនយោធិន គ្រួសារយោធិន និងកងកម្លាំងនគរបាលការពារព្រំដែនគោក គិតចាប់ពីថ្ងៃទី ២៧ ខែ មករា ដល់ថ្ងៃទី ៣១ ខែ មករា ឆ្នាំ ២០២៣ ក្រុមចាក់វ៉ាក់សាំងការពារជំងឺកូវីដ-១៩ របស់កងការពារព្រំដែនគោកលេខ៤០៣ ចាក់ជូនយោធិន គ្រួសារយោធិន និងកងកម្លាំងនគរបាលការពារព្រំដែនគោកលេខ៩០៥ បានចំនួន ៥០០ នាក់។
លោកវរសេនីយ៍ឯក ជឹម សំអោ បានធ្វើការកោតសរសើរដល់កងកម្លាំងដែលជាក្រុមការងារ ដែលធ្វើការងារដោយប្រុងប្រយ័ត្ន ចេះជួយគ្នាទៅវិញទៅមក រក្សាសាមគ្គីភាព លោកមេបញ្ជាការ ក៏បានផ្តាំផ្ញើដល់ជូនយោធិន គ្រួសារយោធិន ទាំងអស់ទោះបីជាបានចាក់វ៉ាក់សាំងទាំង៥ដូសរួចហើយក្តី ត្រូវបន្តអនុវត្តតាមការណែនាំរបស់ក្រសួងសុខាភិបាល ពិសេសវិធានការ និងអនុសាសន៍របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជាគឺ ៣ការពារ ៣កុំផងដែរ។
មេបញ្ជាការ បានមានប្រសាសន៍បន្ថែមទៀតថា ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានដឹកនាំប្រទេសអោយទទួលបានជ័យជំនះលេីការប្រយុទ្ធ និងបង្ក្រាបនូវការរាតត្បាត នៃជំងឺកូវីដ-១៩ ។
