ទេសរដ្ឋមន្ត្រី គន់ គីម ចុះពិនិត្យស្នាក់ការសមាគម អតីតយុទ្ធជនខេត្តបន្ទាយមានជ័យ ដែលសាងសង់បានប្រមាណ ៣០% នឹងរួចរាល់នៅពាក់កណ្តាល ឆ្នាំ២០២៣
ភ្នំពេញ៖ ឯកឧត្ដម ទេសរដ្ឋមន្ត្រី គន់ គីម អនុប្រធាន និង ជាអគ្គលេខាធិការសមាគមអតីតយុទ្ធជនកម្ពុជា រួមជាមួយប្រតិភូអមដំណើរ លោក លី សុវណ្ណារិទ្ធិ លោក ឃ្លោក នួយ អភិបាលរងខេត្ត លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងបន្ទាយមានជ័យ និងជាប្រធានសមាគមន៍អតីតយុទ្ធជនកម្ពុជាខេត្ត នៅថ្ងៃទី២ ខែកុម្ភៈ ឆ្នាំ២០២៣ បានអញ្ជើញចុះពិនិត្យមើលការសាងសង់ អគារស្នាក់ការ សមាគមន៍អតីតយុទ្ធជនកម្ពុជាខេត្ត ដែលមានទីតាំងស្ថិតនៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ និងជាប្រធានសមាគមអតីតយុទ្ធជនខេត្តបន្ទាយមានជ័យ បានប្រាប់ថា៖ អគារស្នាក់ការសមាគមអតីតយុទ្ធជនកម្ពុជាខេត្តបន្ទាយមានជ័យ ត្រូវបានបញ្ចុះបឋមសីលាកាលពីថ្ងៃទី០៩ ខែវិច្ឆិការ ឆ្នាំ២០២២ក្រោមអធិបតីឯកឧត្តម គន់ គីម ទេសរដ្ឋមន្ត្រី និងជាប្រធានសមាគមអតីតយុទ្ធជនកម្ពុជា ដែលមានបណ្តោយ២៨ម៉ែត្រ និងទទឹង២១.៦០ម៉ែត្រ មានបន្ទប់ចំនួន៦បន្ទប់ មានសាលប្រជុំ១បន្ទប់មុខ៥ម៉ែត្រ និងបន្ទប់ធ្វើការងារ និងបន្ទប់ទឹកចំនួន៦បន្ទប់ រហូតមកទល់ពេលនេះសម្រេចបានប្រមាណ៣០%ហើយ។
លោកបានបញ្ជាក់ថា ៖ អគារស្នាក់ការសមាគមអតីតយុទ្ធជននេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានផ្តល់ដីសម្រាប់កសាងដើម្បីបម្រើការងារសមាគមអតីតយុទ្ធជនខេត្តបន្ទាយមានជ័យ មានអតីតយុទ្ធជនទូទាំងខេត្តបន្ទាយមានជ័យចំនួន៦.០០០នាក់។សូមស្តាប់ការលើកឡើងរបស់លោក ជឹម ប៊ុនអាន ។
ថ្លែងនាឱកាសនោះ ឯកឧត្តម គន់ គីម ទេសរដ្ឋមន្ត្រី និងជាប្រធានសមាគមអតីតយុទ្ធជនកម្ពុជា បានឱ្យដឹងថា ៖ អគារស្នាក់ការសមាគមអតីតយុទ្ធជនខេត្តបន្ទាយមានជ័យ ដែលជាអំណោយដ៍ថ្លៃថ្លា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលទទួលសាងសង់ដោយ អ្នកឧកញ៉ាបណ្ឌិត ម៉ម វណ្ណឌី ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយ។
ឯកឧត្តមបានបញ្ជាក់ថា៖ ជាការយកចិត្តទុកដាក់ដ៏ខ្ពង់ខ្ពស់ពីសម្តេចតេជោ ហ៊ុន សែន នាយករដ្ឋមន្ត្រី នៃព្រៈរាជាណាចក្រកម្ពុជា ជាក់ស្តែងនៅខេត្តបន្ទាយមានជ័យមានអតីតយុទ្ធជន ដែលមានអតីតយុទ្ធជនប្រមាណជាង ៦.០០០នាក់ ដែលទទួលបានផ្ទះចំនួន ៣០០ខ្នង ក្នុង១គ្រួសារទទួលបានផ្ទះ១ខ្នង និងដីលំដៅដ្ឋាន៣០ម៉ែត្រ គុណ ៥០ម៉ែត្រ និងដីអាស្រ័យផល១ហិកតា នៅចំណុចដី ការ៉េពីរ ស្ថិតក្នុងឃុំប៉ោយចារ ស្រុកភ្នំស្រុក និងអតីតយុទ្ធជន ដែលមានដីលំនៅដ្ឋាននិងផ្ទះមិនសមរម្យ បានកសាង និងជួសជុលជូនតាមមូលដ្ឋានជាក់ស្តែងពីសមាគមអតីតយុទ្ធជនខេត្ត៕
