អភិបាលខេត្តកំពង់ឆ្នាំង អញ្ជើញជាអធិបតីក្នុងពិធីបើកការដ្ឋានជូសជុលផ្លូវកៅស៊ូ DBST មួយខ្សែ និងលូកាត់ទទឹងផ្លូវចំនួន ៧កន្លែង ស្ថិតក្នុងភូមិទ្រាជើង ស្រុករលាប្អៀរ

ភ្នំពេញ៖ ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង និងឯកឧត្ដម ផាន់ ចាន់តារា សមាជិកក្រុមប្រឹក្សាខេត្ត នាព្រឹកថ្ងៃទី៣ ខែកុម្ភៈ ឆ្នាំ២០២៣ បានអញ្ជើញជាអធិបតីក្នុងពិធីបើកការដ្ឋានជូសជុលផ្លូវកៅស៊ូ DBST មួយខ្សែប្រវែង ២ ៦៥៥ម៉ែត្រ ទទឹង ៦ម៉ែត្រ និងលូកាត់ទទឹងផ្លូវចំនួន ៧កន្លែង ស្ថិតក្នុងភូមិទ្រាជើង ឃុំស្រែថ្មី ស្រុករលាប្អៀរ។

ពិធីនេះក៏មានការចូលរួមពី អភិបាលរងខេត្ត នាយក នាយករងរដ្ឋបាលសាលាខេត្ត ថ្នាក់ដឹកនាំមន្ទីរ អង្គភាព អភិបាលក្រុង ស្រុក អាជ្ញាធរមូលដ្ឋាន និងបងប្អូនប្រជាពលរដ្ឋ។

គម្រោងជួសជុលផ្លូវកៅស៊ូ DBST មួយខ្សែនេះ គឺជាគម្រោងអភិវឌ្ឍន៍របស់រដ្ឋបាលខេត្ត សម្រាប់អភិវឌ្ឍហេដ្ឋារចនាសម្ព័ន្ធរូបវ័ន្តឲ្យកាន់តែល្អប្រសើរ ជួយសម្រួលដល់ការធ្វើដំណើរការរបស់បងប្អូនប្រជាពលរដ្ឋ កម្មករ កម្មការិនី សិស្សានុសិស្ស និងការប្រកបមុខរបរ ការដឹកជញ្ជូនកសិផលផ្សេងៗ សំដៅចូលរួមកាត់បន្ថយភាពក្រីក្រ ស្របតាមកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំ ប្រកបដោយគតិបណ្ឌិត។

ផ្លូវមួយខ្សែនេះក៏នឹងបំពាក់បង្គោលភ្លើង និងអំពូលសូឡាចំនួនប្រមាណ ១០០ដើម ដើម្បីជួយសម្រួលដល់ការធ្វើដំណើររបស់បងប្អូននៅពេលយប់ និងលើកកម្ពស់សោភ័ណភាពក្នុងតំបន់នោះ ឲ្យកាន់តែស្រស់បំព្រងថែមទៀត។

ក្នុងឱកាសនោះដែរ ឯកឧត្តមអភិបាលខេត្ត បានឧបត្ថម្ភអំណោយជូនបងប្អូនប្រជាពលរដ្ឋចំនួន ៣០០នាក់ ដោយក្នុងម្នាក់ៗទទួលបាន សារុង ១ និងថវិកាមួយចំនួន ៕