ថៃគ្រោងបើកដំណើរការផ្សារណាត់ នៅច្រកទ្វារព្រំដែនបានថាសែន ខេត្តត្រាត ទល់មុខច្រកទ្វារព្រំដែនថ្មដា ខេត្តពោធិ៍សាត់

ភ្នំពេញ៖ ភាគីថៃ គ្រោងនឹងបើកដំណើរការ ផ្សារណាត់ របស់ខ្លួននៅច្រកទ្វារព្រំដែនបានថាសែន ខេត្តត្រាត ទល់មុខច្រកទ្វារព្រំដែនថ្មដា ខេត្តពោធិ៍សាត់ នៅថ្ងៃទី១ ខែមេសា ឆ្នាំ២០២៣ខាងមុខ ដើម្បីឲ្យប្រជាពលរដ្ឋខេត្តជាប់ព្រំដែន នៃប្រទេសទាំង២ អាចដោះដូរ និងទិញទំនិញគ្នាទៅវិញទៅមក មុននឹងឈានដល់ដំណើរការបើកច្រកទ្វារព្រំដែននេះ ឲ្យក្លាយជាច្រកទ្វារព្រំដែនអន្តរជាតិ។

នេះជាការបញ្ជាក់ឯកឧត្ដម ឆាំណានវីត តេរ៉ាត់ អភិបាលខេត្តត្រាត នៅក្នុងកិច្ចប្រជុំពិក្សាគ្នា ជាមួយឯកឧត្ដម ខូយ រីដា អភិបាលខេត្តពោធិ៍សាត់ នាថ្ងៃទី៤ ខែកុម្ភៈ ឆ្នាំ២០២៤នេះ នៅសាលប្រជុំសាលាខេត្តពោធិ៍សាត់ ដើម្បីលើកកម្ពស់កិច្ចសហប្រតិបត្តិការផ្នែកសេដ្ឋកិច្ច និងទេសចរណ៍ រវាងខេត្តជាប់ព្រំដែន នៃប្រទេសទាំង២។

ឯកឧត្ដម ឆាំណានវីត តេរ៉ាត់ បានឲ្យដឹងថា ក្នុងនាមថ្នាក់ដឹកនាំរដ្ឋបាលខេត្តត្រាត លោកបានសម្តែងនូវក្តីសោមនស្សរីករាយក្រៃលែង ដែលបានមកជួបជាមួយថ្នាក់ដឹកនាំ រដ្ឋបាលខេត្តពោធិ៍សាត់ ដើម្បីរឹតចំណងសាមគ្គីភាព មានកិច្ចសហប្រតិបត្តិការល្អ ក្នុងនាមខេត្តជាប់ព្រំដែននឹងគ្នា។ ឯកឧត្ដមបានជម្រាបជូនថា លោកបានប្រើប្រាស់អំណាច និងតួនាទីផ្ទាល់ ក្នុងការបង្កើតផ្សារណាត់មួយ នៅច្រកព្រំដែនបានថាសែន ទល់មុខច្រកព្រំដែនថ្មដា ដើម្បីឲ្យប្រជាពលរដ្ឋនៅជាប់ព្រំដែន នៃប្រទេសទាំង២អាចដោះដូរ និងទិញទំនិញគ្នា។ ជាមួយគ្នានោះ ប្រសិនបើសភាពការណ៍ពុំមានអ្វីប្រែប្រួលទេនោះ ផ្សារណាត់នេះ អាចនឹងចាប់ដំណើរការ នៅថ្ងៃទី០១ ខែមេសា ឆ្នាំ២០២៣ឆាប់ៗខាងមុខ។

ឯកឧត្ដមអភិបាលខេត្តត្រាត បានបន្ថែមថា ការព្យាយាមមួយទៀត ក្នុងការជំរុញសេដ្ឋកិច្ចនៃប្រទេសទាំង គឺលោកបានគិតគូរពីការរៀបចំធ្វើផ្សារណាត់ចល័តមួយ ដើម្បីឲ្យប្រជាជននៃខេត្តត្រាត អាចយកទំនិញមកលក់ដូរនៅខេត្តពោធិ៍សាត់បាន ហើយប្រជាជននៃខេត្តពោធិ៍សាត់ ក៏អាចយកទំនិញមកលក់ដូរនៅខេត្តត្រាតបានដែរ នោះដ៏រាបណាថ្នាក់ដឹកនាំ មន្ទីរជំនាញ នៃខេត្តទាំង២ បានជួយពិភាក្សា និងចុះMOUនឹងគ្នា។

ឯកឧត្ដមបានគូសបញ្ជាក់ថា ទាំងភាគីថៃ ក៏ដូចជាភាគីកម្ពុជា ចង់បានខ្លាំងណាស់ ក្នុងការពន្លឿន និងតម្លើងច្រកទ្វារព្រំដែនខាងលើ ឲ្យក្លាយជាច្រកទ្វារព្រំដែនអន្តរជាតិឲ្យបានឆាប់រហ័ស កត្តាសំខាន់នៅចំពោះមុខយើងនេះ យើងត្រូវដោះស្រាយបញ្ហាដែលសេសល់តាមព្រំដែនខ្លះ ហើយដំណើរការផ្សារណាត់ក៏ជាគ្រឹះដំបូងគេ ឈានដល់ការបើកច្រកទ្វារព្រំដែនអន្តរជាតិផងដែរ ៕