សម្តេចវិបុលសេនាភក្តី សាយ ឈុំ អញ្ជើញដឹកនាំគណៈប្រតិភូព្រឹទ្ធសភា គោរពវិញ្ញាណក្ខន្ធ សព លោកជំទាវ ប៊ុន សុថា ហៅ ប៊ុន សាមហុឹង
ភ្នំពេញ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា នារសៀលថ្ងៃសៅរ៍ ១៤កើត ខែមាឃ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី៤ ខែកុម្ភៈ ឆ្នាំ២០២៣ បានអញ្ជើញដឹកនាំគណៈប្រតិភូព្រឹទ្ធសភា អញ្ជើញគោរពវិញ្ញាណក្ខន្ធ សព លោកជំទាវ ប៊ុន សុថា ហៅ ប៊ុន សាមហុឹង ដែលត្រូវជាប្អូនស្រីបង្កើត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានទទួលមរណភាព កាលពីថ្ងៃសុក្រ ទី៣ ខែកុម្ភៈ ឆ្នាំ២០២៣ វេលាម៉ោង ១៨:១៣នាទីល្ងាច ក្នុងជន្មាយុ៦៧ឆ្នាំ ដោយរោគាពាធ។
សម្តេចវិបុលសេនាភក្តី សាយ ឈុំ និងលោកជំទាវ សូមចូលរួមរំលែកទុក្ខជាមួយ ឯកឧត្តម សម្តេចកិត្តិព្រឹទ្ធណ្ឌិត ប៊ុន រ៉ានី ហ៊ុន សែន ព្រមទាំងក្រុមគ្រួសារចំពោះការបាត់បង់ភរិយា មាតា ជីដូន ប្អូនស្រីបង្កើត ប្អូនថ្លៃ និងម្តាយមីង ជាទីគោរពស្រលាញ់ពោពេញទៅដោយព្រហ្មវិហារធម៌ដ៏ល្អប្រពៃ និងមិនចេះរីងស្ងួត ក្នុងការអប់រំបុត្រធីតា និងគ្រួសារប្រកបដោយការទទួលខុសត្រូវខ្ពស់បំផុត។
សម្តេចវិបុលសេនាភក្តី សាយ ឈុំ និងលោកជំទាវ សូមបួងសួងដល់វត្ថុសក្តិសិទ្ធ ក្នុងលោក និងតេជៈបារមី នៃព្រះពុទ្ធ ព្រះធម៌ ព្រះសង្ឃ តាមជួយបីបាច់ថែរក្សាដល់ដួងវិញ្ញាណក្ខន្ធ លោកជំទាវ ប៊ុន សុថា ហៅ ប៊ុន សាមហុឹង បានទៅកាន់សុគតិភព កុំបីឃ្លៀងឃ្លាតឡើយ ៕
