សម្ដេច ហេង សំរិន៖ ព្រះពុទ្ធសាសនា ជាសាសនារបស់រដ្ឋ

ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា មានប្រសាសន៍ថា ព្រះពុទ្ធសាសនា ជាសាសនារបស់រដ្ឋដែលមិនត្រឹមធ្វើឱ្យបងប្អូនប្រជាពលរដ្ឋបានរួមរស់ជាមួយគ្នាដោយសុខសាន្តប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់សុខសន្តិភាព ស្ថិរភាពសង្គម ការអភិវឌ្ឍប្រទេសជាតិ។

តាមរយៈបណ្ដាញសង្គម នាថ្ងៃទី៥ ខែកុម្ភៈ ឆ្នាំ២០២៣នេះ សម្ដេច ហេង សំរិន បានមាមប្រសាសន៍ថា “ ថ្ងៃអាទិត្យ ១៥កើត ខែមាឃ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៥ ខែកុម្ភៈ ឆ្នាំ២០២២នេះ ជាពិធីបុណ្យមាឃបូជា ដែលជាពិធីបុណ្យដ៏សំខាន់នៅក្នុងព្រះពុទ្ធសាសនា ហើយប្រជាពុទ្ធបរិស័ទយើងបានប្រារព្ធធ្វើជារៀងរាល់ឆ្នាំរហូតមក។

បុណ្យមាឃបូជា បានប្រារព្ធធ្វើឡើងតាមគន្លងព្រះពុទ្ធសាសនា ដើម្បីរំលឹកដល់ថៃ្ង ដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើងក្នុងលោកនាប្រទេសឥណ្ឌា កាលពី៥៨៨ឆ្នាំ មុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់។ មាឃបូជាក៏ជាថ្ងៃរំលឹកដល់ការដាក់អាយុសង្ខារ ចូលព្រះបរិនិព្វានរបស់ព្រះពុទ្ធអង្គផងដែរ។

ព្រះពុទ្ធសាសនា ជាសាសនារបស់រដ្ឋដែល មិនត្រឹម ធ្វើឱ្យបងប្អូនប្រជាពលរដ្ឋយើងបានរួមរស់ជាមួយគ្នាដោយសុខសាន្តប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់សុខសន្តិភាព ស្ថិរភាពសង្គម ការអភិវឌ្ឍប្រទេសជាតិ លើគ្រប់វិស័យ និងថែរក្សាការពារអត្តសញ្ញាណប្រជាជាតិខ្មែរ ទៀតផង។

ឆ្លៀតឱកាសនេះ សូមប្រគេនពរព្រះតេជគុណគ្រប់ព្រះអង្គ និងជូនពរជនរួមជាតិគ្រប់ៗគ្នា បានសមប្រកបដោយពុទ្ធពរទំាងបួនប្រការ អាយុ វណ្ណៈ សុខៈ ពលៈកុំបីឃ្លៀងឃ្លាតឡើយ” ៕