ភ្នំ១៥០០ទឹកធ្លាក់ថ្មដាតូច ជាកន្លែងល្អសម្រាប់អ្នកចូលចិត្តដើរកម្សាន្តបែបព្រៃភ្នំ

ខេត្តពោធិ៍សាត់៖ សម្រាប់អ្នកដែលចូលចិត្តការដើររកម្សាន្តបែបព្រៃភ្នំពេញកុំភ្លេចរមណីយដ្ឋានទឹកធ្លាក់ថ្មដាតូច ខេត្តពោធិ៍សាត់ ប្រសិនបើបងប្អូន ចង់ធ្វើដំណើរកម្សាន្តតាមបែបព្រៃភ្នំធម្មជាតិ ដែលមានទឹកជ្រោះ ទឹកធ្លាក់ អមទៅដោយរុក្ខជាតិ ពណ៌បៃតងស្រស់នោះ បងប្អូនត្រូវធ្វើដំណើរចេញពីរង្វង់មូលស្រុកវាលវែង ក្នុងចម្ងាយ៤៤គ.ម នឹងបានដល់ភ្នំ១៥០០ ដែលនៅទីនោះ មាន ”រមណីយដ្ឋានទឹកធ្លាក់ថ្មដាតូច” ។

មន្ទីរទេសចរណ៍ខេត្តពោធិ៍សាត់បញ្ជាក់ថាជាក់ស្តែង ចាប់ពីគីឡូម៉ែត្រ លេខ ១៤១-១៤៥ បងប្អូននឹងអាចធ្វើដំណើរលើផ្លូវអន្ទង់អាំង (ផ្លូវបុប្ផាលាក់ខ្លួន) ដែលមានភាពបត់បែនជាអន្លើៗ តាមជើងភ្នំ និងជម្រាលភ្នំ គួរឲ្យទាក់ទាញនិងរំភើបរីករាយ ។

លុះមកដល់គីឡូម៉ែត្រលេខ ១៤៩-១៥៣ បងប្អូនអាចសំចតមធ្យោបាយធ្វើដំណើរ ដើម្បីស្រូបយកខ្យល់អាកាសបរិសុទ្ធ និងគយគន់ទេសភាពដ៏ស្រស់បំព្រង ហើយថតរូបភាព “សែលហ្វី” ទុកជាអនុស្សាវរីយ៍ ។

តមក ពេលបងប្អូនធ្វើដំណើរមកដល់បង្គោលគីឡូម៉ែត្រលេខ១៦២- ១៦៣ ត្រង់ជម្រាលភ្នំមួយកន្លែង បងប្អូននឹងឃើញទីតាំងដែលមានទឹកហូរ ទឹកធ្លាក់ថ្នាក់ៗ (មានតូបលំហែ) ដែលជាទីតាំង “រមណីយដ្ឋានទឹក ធ្លាក់ថ្មដាតូច” ដែលនៅទីនោះ មានលក់ម្ហូបអាហារជាច្រើនមុខ មានតម្លៃទទួលយកបាន។ រីឯប៉ែកខាងក្រោមទីតាំងនេះ មានទឹកធ្លាក់កម្ពស់ជិត១០ម៉ែត្រ មានទឹកថ្លាខ្មៅយង់ ហូរកាត់ផ្ទាំងថ្មដា អមទៅដោយព្រៃព្រឹក្សាលតាវល្លិត្រឈឹងត្រឈៃ គួរជាទីមនោរម្យ។ ទីតាំងរមណីយដ្ឋានខាងលើ មានចម្ងាយ៣៤៤គ.ម ពីរាជធានីភ្នំពេញ និង១៥៣គ.ម ពីទីរួមខេត្តពោធិ៍សាត់៕