រដ្ឋមន្ត្រីក្រសួងបរិស្ថាន ជំរុញឱ្យអនុវត្តគោលការណ៍ 3Rនិងសេដ្ឋកិច្ចចក្រា ព្រោះជាគន្លឹះសំខាន់ក្នុងការគ្រប់គ្រងបរិស្ថាន
ភ្នំពេញ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានជំរុញដល់បណ្ដាប្រទេសផ្សេងៗនៅក្នុងតំបន់អាស៊ីនិងប៉ាស៊ីហ្វិកត្រូវអនុវត្តគោលការណ៍ 3Rនិងសេដ្ឋកិច្ចចក្រាព្រោះជាគន្លឹះមួយដ៏សំខាន់នៅក្នុងការគ្រប់គ្រងទៅលើបរិស្ថាន។
ការលើកឡើងរបស់ឯកឧត្ដមបែបនេះធ្វើឡើង នៅក្នុងឳកាសអញ្ជើញជាអធិបតីបើកជាផ្លូវការ វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ស្តីពី «3R និងសេដ្ឋកិច្ចចក្រា»ក្រោមប្រធានបទ «សមាហរណកម្មសេដ្ឋកិច្ចចក្រាទៅក្នុងការអភិវឌ្ឍន៍វិស័យចម្បងៗដើម្បីឈានឆ្ពោះទៅសម្រេចបានសង្គមគ្មានសំណល់ និងគោលដៅអភិវឌ្ឍន៍ប្រកបដោយចីរភាព» នៅព្រឹកថ្ងៃទី៨ ខែកុម្ភៈ ឆ្នាំ២០២៣។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានគូសបញ្ជាក់ អំពីភាពចាំបាច់ដែលបណ្ដាប្រទេសផ្សេងៗនៅក្នុងតំបន់អាស៊ីនិងប៉ាស៊ីហ្វិកនេះត្រូវសហការនិងសាមគ្គីគ្នា ក្នុងការធ្វើកិច្ចការងារនេះប្រកបដោយការទទួលខុសត្រូវហើយសហប្រតិបត្តិការនៅក្នុងនាមជាដៃគូដើម្បីធ្វើឲ្យមានប្រសិទ្ធភាពទាំងការផ្ទេរបច្ចេកទេសនិងទាំងការធ្វើយ៉ាងម៉េចឲ្យ ប្រទេសដែលមានការអភិវឌ្ឍតិចគឺទទួលបាននូវការគិតគូរហើយធ្វើឲ្យមានការការពារនូវបរិស្ថានដូចគ្នាដែរ។
ជាមួយគ្នានេះឯកឧត្តមរដ្ឋមន្ត្រី បានជំរុញនូវការអនុវត្តគោលការណ៍ 3Rនិងសេដ្ឋកិច្ចចក្រានេះព្រោះគឺជាគន្លឹះមួយដ៏សំខាន់នៅក្នុងការគ្រប់គ្រងទៅលើបរិស្ថានហើយជាពិសេសនោះគឺថាធានាឲ្យបាននូវកិច្ចគាំពារបរិស្ថាននិងការអភិវឌ្ឍដោយចេរភាពហើយក៏បានផ្ដោតសំខាន់ផងដែរពាក់ព័ន្ធជាមួយនឹងការប្រើប្រាស់និងការធ្វើយ៉ាងម៉េចដើម្បីឲ្យមានការកាត់បន្ថយនូវការប្រើប្រាស់ធនធានធម្មជាតិសម្រាប់ជាមូលដ្ឋានតាមរយៈការប្រើប្រាស់ឡើងវិញហើយការអនុវត្តនូវ សេដ្ឋកិច្ចចក្រា គឺដើម្បីកាត់បន្ថយនូវការប្រើប្រាស់នូវធនធានធម្មជាតិដែលជាមូលដ្ឋាននៃការផលិតដើម្បីធ្វើម៉េចឲ្យធនធានធម្មជាតិរបស់យើងអាចប្រើប្រាស់បានយូរ។
សូមរំលឹកថា វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ស្តីពី «3R និងសេដ្ឋកិច្ចចក្រា»ធ្វើឡើងចាប់ពីថ្ងៃទី៨ ដល់ថ្ងៃទី១០ ខែកុម្ភៈ ឆ្នាំ២០២៣ ដោយសហការរៀបចំដោយក្រសួងបរិស្ថាន នៃប្រទេសជប៉ុន និងមជ្ឈមណ្ឌលសហប្រជាជាតិសម្រាប់ការអភិវឌ្ឍក្នុងតំបន់ (UNCRD) វេទិកាតំបន់ដ៏មានសារៈសំខាន់នេះនឹងមានការអញ្ជើញចូលរួមពីគណៈប្រតិភូតំណាងប្រទេសចំនួន ៣៥៕
