រដ្ឋបាលខេត្តតាកែវ ទទួលស្វាគមន៍ប្រតិភូ គណៈកម្មការទី២ ព្រឹទ្ធសភា ចុះសិក្សាឈ្វេងយល់ អំពីការពង្រឹងកិច្ចការរដ្ឋបាលឃុំ-សង្កាត់ជាមួយរដ្ឋបាលខេត្តតាកែវ

ភ្នំពេញ៖ ឯកឧត្តម យស ណាស៊ី ប្រធានក្រុមប្រឹក្សាខេត្ត និង ឯកឧត្តម អ៊ូច ភា អភិបាលខេត្តតាកែវ នាថ្ងៃទី៩ ខែកុម្ភៈ ឆ្នាំ២០២៣ បានទទួលស្វាគមន៍បដិសណ្ឋារកិច្ច ឯកឧត្តម កិត្តិសេដ្ឋាបណ្ឌិត ជា ជេដ្ឋ ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា និង ឯកឧត្តម លោកជំទាវ អនុប្រធាន លេខាធិការ និងសមាជិក គណៈកម្មការ ចុះសិក្សាឈ្វេងយល់ អំពីការពង្រឹងកិច្ចការរដ្ឋបាលឃុំ-សង្កាត់ ខេត្តខេត្តតាកែវ។ ដែលកិច្ចប្រជុំនេះ ក៏មានការអញ្ជើញចូលរួមដោយ អភិបាលរងខេត្ត លោក លោកស្រី ប្រធានមន្ទីរអង្គភាពពាក់ព័ន្ធជុំវិញខេត្ត លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត លោកឧត្តមសេនីយ៍ត្រី ស្នងការរងនគរបាលខេត្ត និងមន្រ្តីរាជការពាក់ព័ន្ធ។

មានប្រសាសន៍ស្វាគមន៍គណៈប្រតិភូនាឱកាសនោះដែរ ឯកឧត្តម អ៊ូច ភា អភិបាលខេត្តតាកែវ បានលើកឡើងថា ក្នុងការលើកកម្ពស់ ការអភិវឌ្ឍន៍មូលដ្ឋាន ស្របតាមច្បាប់ស្តីពីការគ្រប់គ្រង រដ្ឋបាលរាជធានី ខេត្ត ក្រុង ស្រុក ខណ្ឌ និងគោលនយោបាយកំណែទម្រងវិមជ្ឈការ រដ្ឋបាលខេត្តបានយកចិត្តទុកដាក់ អនុវត្តតួនាទី ភារកិច្ច ស្របតាមច្បាប់ និងវិធានការនានា សំដៅឲ្យការអនុវត្តន៍របស់រដ្ឋបាលខេត្ត ធានាបាននូវប្រសិទ្ធភាពការងារ និងធ្វើការឆ្លើយតបគោលនយោបាយរបស់រាជរដ្ឋាភិបាល និងតម្រូវការនានារបស់ប្រជាពលរដ្ឋនៅមូលដ្ឋានប្រកបដោយ ភាពឆ្លើយតប។

ឯកឧត្តមអភិបាលខេត្ត បានបញ្ជាក់ដែរថា មកដល់បច្ចុប្បន្ននេះ ប្រជាពលរដ្ឋស្ទើរគ្រប់គ្រួសារ សុទ្ធតែមានសៀវភៅគ្រួសារ សៀវភៅស្នាក់នៅ អត្តសញ្ញាណប័ណ្ណសញ្ញាតិខ្មែរ និងអត្រានុកូលដ្ឋាន។ ក្នុងគោលដៅ លើកកម្ពស់សេវាកាន់តែប្រសើរថែមទៀត រដ្ឋបាលខេត្តបានពង្រីកការផ្តល់សេវាស្របតាមគោលនយោបាយរបស់រាជ រដ្ឋាភិបាល ពាក់ព័ន្ធនឹងវិស័យនានា ទាំងនៅថ្នាក់ខេត្ត និងក្រុង ស្រុក ឃុំ សង្កាត់ ជូនប្រជាពលរដ្ឋ។

ក្នុងឱកាសនោះ ឯកឧត្តម កិត្តិសេដ្ឋាបណ្ឌិត ជា ជេដ្ឋ ប្រធានគណៈកម្មការទី២ នៃព្រឹទ្ធសភា បានថ្លែងការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងធ្វើការងារអស់ កម្លាំងកាយចិត្តរបស់រដ្ឋបាលខេត្ត អាជ្ញាធរ មន្ទីរអង្គភាពពាក់ព័ន្ធទាំងអស់ ក្នុងការបំពេញការងាររបស់ខ្លួនប្រកបដោយការទទួលខុសត្រូវខ្ពស់ ក្នុងការបម្រើនូវសេវាសាធារណៈជូនបងប្អូនប្រជាពលរដ្ឋនៅតាមមូលដ្ឋានបានយ៉ាងល្អប្រសើនាពេលកន្លងមក។

មន្ថែមលើសពីនេះ ឯកឧត្តម កិត្តិសេដ្ឋាបណ្ឌិត ជា ជេដ្ឋ បានជំរុញ និងផ្ដល់កម្លាំងចិត្តដល់រដ្ឋបាលខេត្តអាជ្ញាធរពាក់ព័ន្ធ ធ្វើយ៉ាងណាត្រូវតែបម្រើសេវាសាធារណៈជូនបងប្អូនប្រជាពលរដ្ឋនៅតាមមូលដ្ឋានឱ្យកាន់តែប្រសើរឡើងថែមទៀត ស្របតាមគោលនយោបាយរបស់រាជរដ្ឋាភិបាល ដែលបានដាក់ចេញក្នុងការបម្រើសេវាសាធារណៈ ជូនប្រជាពលរដ្ឋឱ្យកាន់តែប្រសើរឡើងមួយទ្វេដងថែមទៀតនោះ៕