របងថ្មដែលបានសាងសង់ នៅតាមឆ្នេរអូឈើទាល ក្រុងព្រះសីហនុ ត្រូវម្ចាស់វាយកម្ចេចចោលវិញ តាមបទបញ្ជារបស់រដ្ឋាភិបាលកម្ពុជា
ព្រះសីហនុ៖ របងថ្មដែលត្រូវបានសាងសង់នៅតាមតាមឆ្នេរអូឈើទាល ក្រុងព្រះសីហនុ ហើយទទួលការរិះគន់យ៉ាងខ្លាំង តាមបណ្តាញសង្គមនារយៈពេលប៉ុន្មានថ្ងៃមកនេះ ត្រូវបានម្ចាស់ទីតាំងវាយកម្ចេចចោលវិញហើយ តាមបទបញ្ជារបស់រដ្ឋាភិបាលកម្ពុជា និងមានការណែនាំពីអាជ្ញាធរខេត្ត។ ការវាយកម្ចេចចោលនេះ បានធ្វើឡើងនាយប់ថ្ងៃទី៨ ខែកុម្ភៈ ឆ្នាំ២០២៣។
អភិបាលរងខេត្តព្រះសីហនុ លោក ឡុង ឌីម៉ង់ បានបញ្ជាក់ប្រាប់ថា ការរុះរើសំណង់របងរឹងដែលនៅតាមបណ្តោយឆ្នេរនេះគឺធ្វើឡើងក្រោយពីមានបទបញ្ជាពីសម្តេចតេជោ ហ៊ុន សែន កាលពីម្សិលមិញ។
លោកថ្លែងដូច្នេះថា៖ «យើងបានទទួលការណែនាំពីសម្តេចតេជោ នាយករដ្ឋមន្ត្រី ល្ងាចមិញបានណែនាំឱ្យរដ្ឋបាលខេត្តព្រះសីហនុ ធ្វើការសម្របសម្រួលជូនដំណឹងទៅម្ចាស់ទីតាំង ម្ចាស់កម្មសិទ្ធិ «ក» ហ្នឹងធ្វើការកែសម្រួល រុះរបងប៉ែកខាងសមុទ្រនោះចេញ អ៊ីចឹងយើងបានធ្វើការរុះរើហើយតាំងពីយប់មិញ»។
ការរុះរើសំណង់របងរឹងនេះ បន្ទាប់ពីមានមហាជនសម្តែងការងឿងឆ្ងល់ថាតើអ្នកណាមានអំណាចនៅពីក្រោយនៃការសាងសង់របងនេះ ខណៈអាជ្ញាធរអះអាងថាសំណង់រឹងនោះជាកម្មសិទ្ធឯកជនដែលមានច្បាប់ត្រឹមត្រូវ។
អ្នកនាំពាក្យសាលាខេត្តព្រះសីហនុ និងជាអភិបាលរងខេត្ត លោក ឡុង ឌីម៉ង់ បានបញ្ជាក់ថា ទីតាំងដីខាងលើពីមុនគឺជារបស់អង្គភាពនគរបាលជើងទឹក ហើយត្រូវបានធ្វើអនុប្រយោគទៅជាសម្បត្តិឯកជនរបស់រដ្ឋ និងប្រគល់ឱ្យក្រុមហ៊ុនឯកជនធ្វើការអភិវឌ្ឍន៍បន្ត។
លោកបញ្ជាក់ថា៖ «នីតិវិធីការកសាងប័ណ្ណកម្មសិទ្ធិ គឺត្រឹមត្រូវរួចអស់ហើយពីរាជរដ្ឋាភិបាលតាំងពីឆ្នាំ២០០៧ និងចេញប័ណ្ណតាំងពីឆ្នាំ២០០៨ ចេញប័ណ្ណកម្មសិទ្ធិឯកជន»។
សូមបញ្ជាក់ថា រយៈពេលប៉ុន្មានថ្ងៃមកនេះមានការរិះគន់យ៉ាងខ្លាំងពីមហាជន រឿងសង់របងលើឆ្នេរអូឈើទាល ក្រុងព្រះសីហនុ ដែលធ្វើឲ្យបាត់បងសោភ័ណ្ឌភាពឆ្នេរ។ តែនៅពេលនេះស្ថានភាពឆ្នេរវិលទៅសភាពដើមវិញ ក្រោយមានការចំណាត់ការភ្លាមៗពីថ្នាក់ដឹកនាំ និងក្រោមការសម្របសម្រួលពីអាជ្ញាធរខេត្តព្រះសីហនុ៕
