ឯកឧត្តម ឆាយ ថន អញ្ជើញជាអធិបតីបើកសិក្ខាសាលាភាគីពាក់ព័ន្ធស្តីពី “ការអនុវត្តជំរឿនកសិកម្មនៅព្រះរាជាណាចក្រកម្ពុជាឆ្នាំ២០២៣”
ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ នាព្រឹកថ្ងៃទី៩ ខែកុម្ភៈ ឆ្នាំ២០២៣ បានអញ្ជើញជាអធិបតីភាពបើកសិក្ខាសាលាភាគីពាក់ព័ន្ធស្តីពី “ការអនុវត្តជំរឿនកសិកម្មនៅព្រះរាជាណាចក្រកម្ពុជាឆ្នាំ២០២៣”។ ដោយមានការអញ្ជើញចូលរួមពីថ្នាក់ដឹកនាំក្រសួងផែនការ ឯកឧត្តម ចាន់ ចេស្តារ រដ្ឋលេខាធិការ តំណាងក្រសួងកសិកម្ម រុក្ខាប្រមាញ់ និង នេសាទ លោក Antonio Schiavone តំណាងអង្គការស្បៀងនិងកសិកម្មនៃអង្គការសហប្រជាតិ ប្រចាំកម្ពុជា (FAO) ឯកឧត្តម លោកជំទាវ លោក លោកស្រី តំណាងមកពីក្រសួង ស្ថាប័ន និងភ្ញៀវកិត្តិយសជាតិ អន្តរជាតិ សរុបប្រមាណ១០០នាក់។
ឯកឧត្តមកិត្តិសេដ្ឋាបណ្ឌិត បានបញ្ជាក់ថា គោលបំណង នៃសិក្ខាសាលាថ្ងៃនេះ គឺដើម្បីពិនិត្យពិភាក្សា និងផ្តល់ធាតុចូល ឬអនុសាសន៍សំខាន់ៗបន្ថែម លើខ្លឹមសារនៃឯកសារពាក់ព័ន្ធដូចជា៖ តារាងសំណួរជំរឿនកសិកម្ម ទស្សនាទាននៃជំរឿនកសិកម្មតាមបទដ្ឋានស្តង់ដារអន្តរជាតិ ការវិភាគទិន្នន័យជំរឿនសម្រាប់ការផ្សព្វផ្សាយដល់អ្នកប្រើប្រាស់ ធានាឱ្យដំណើរការអនុវត្ត ប្រព្រឹត្តទៅរលូនប្រកបដោយគុណភាព និងប្រសិទ្ធភាពខ្ពស់។
ឯកឧត្តមកិត្តិសេដ្ឋាបណ្ឌិត បន្តថា ការងារជំរឿនកសិកម្មនៅព្រះរាជាណាចក្រកម្ពុជា ឆ្នាំ២០២៣ គឺត្រូវបានអនុញ្ញាតឱ្យធ្វើជាលើកទីពីរ បន្ទាប់ពីបានធ្វើជំរឿនកសិកម្មលើកទីមួយនៅឆ្នាំ២០១៣ និងអង្កេតពាក់កណ្តាលជំរឿននៅឆ្នាំ២០១៩ និងអង្កេតកសិកម្មជាប្រចាំឆ្នាំ២០២០ ២០២១ និងឆ្នាំ២០២២ ដែលឧបត្ថម្ភគាំទ្រផ្នែកហិរញ្ញវត្ថុ និងបច្ចេកទេសពីដៃគូអភិវឌ្ឍន៍ អង្គការស្បៀង និងកសិកម្មនៃអង្គការសហប្រជាជាតិ (FAO) និងថវិការបស់រាជរដ្ឋាភិបាលកម្ពុជា ដែលបានអនុវត្តកន្លងមកប្រកបដោយជោគជ័យ។
ឯកឧត្តមកិត្តិសេដ្ឋាបណ្ឌិត មានប្រសាសន៍បន្ថែមថា ការធ្វើជំរឿនកសិកម្ម គឺពិតជាមានសារៈសំខាន់បំផុតដែលត្រូវធ្វើមិនអាចខ្វះបានដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់បំផុត ក្នុងការរៀបចំធ្វើគោលនយោបាយអភិវឌ្ឍន៍វិស័យកសិកម្ម សេដ្ឋកិច្ច បរិស្ថាន សង្គម ការប្រែប្រួលអាកាសធាតុ និងសុខុមាលភាពរបស់ប្រជាជនកម្ពុជា ហើយនិងជាសូចនាករយ៉ាងសំខាន់សម្រាប់ត្រួតពិនិត្យ តាមដានវាយតម្លៃលើកម្មវិធីគោលនយោបាយអភិវឌ្ឍន៍សេដ្ឋកិច្ច សង្គមកិច្ចរបស់រាជរដ្ឋាភិបាលកម្ពុជា ផែនការយុទ្ធសាស្រ្តអភិវឌ្ឍន៍ជាតិ យុទ្ធសាស្រ្តនៃការលុបបំបាត់ភាពក្រីក្រ និងគោលដៅអភិវឌ្ឍន៍ប្រកបដោយចីរភាពកម្ពុជា(CSDGs)ឆ្នាំ២០១៦-២០៣០ ៕
