សម្ដេច ស ខេង ជំរុញមន្រ្តីបក្សប្រជាជន គាំទ្រ និងចូលរួមអនុវត្តការងារ ដែលបានដាក់ចេញឲ្យសកម្មព្រមៗគ្នា ដើម្បីបន្តដណ្ដើមជ័យជម្នះ សម្រាប់ការបោះឆ្នោតខាងមុខ

ភ្នំពេញ៖ សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង និងព្រៃវែង បានជំរុញលើកទឹកចិត្តដល់ថ្នាក់ដឹកនាំ មន្រ្តីក្រុមការងារ និងគណបក្សគ្រប់ថ្នាក់ ផ្ដល់ការគាំទ្រ និងការចូលរួមអនុវត្តការងារដែលបានដាក់ចេញឱ្យសកម្មព្រមៗគ្នា ដើម្បីគណបក្សបន្តដណ្ដើមបានជោគជ័យសម្រាប់ការបោះឆ្នោតខាងមុខនេះ ។

នាថ្ងៃទី១២ ខែកុម្ភៈ ឆ្នាំ២០២៣ សម្តេចក្រឡាហោម ស ខេង បានអញ្ជើញជាអធិបតីក្នុងកិច្ចប្រជុំផ្សព្វផ្សាយសេចក្តីសម្រេចចិត្ត នៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា ប្រារព្ធនៅមជ្ឈមណ្ឌលសុភមង្គល ក្រុងបាត់ដំបង ខេត្តបាត់ដំបង។

អញ្ជើញមានប្រសាសន៍នាឱកាសនោះ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានខេត្តបាត់ដំបង និងព្រៃវែង បានណែនាំ ឯកឧត្តម លោកជំទាវ អស់លោក លោកស្រី ជាសមាជិកអង្គប្រជុំនៅថ្ងៃនេះ បន្តយកខ្លឹមសារសំខាន់ៗ នៃសេចក្តីសម្រេចចិត្ត នៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា និងពីកិច្ចប្រជុំនៅថ្ងៃនេះ ផ្សព្វផ្សាយជូនសមាជិក សមាជិការ និងអ្នកគាំទ្រគណបក្សនៅតាមមូលដ្ឋានឱ្យបានជ្រាបគ្រប់ៗគ្នា។

សម្ដេចមានប្រសាសន៍ថា ក្រោយការបោះឆ្នោតឆ្នាំ២០២៣ គណបក្សនឹងប្រែក្លាយឯកសារដែលបានសម្រេចចិត្តក្នុងមហាសន្និបាតវិសាមញ្ញ រៀបចំជាកម្មវិធីនយោបាយសម្រាប់អាណត្តិទី៧ ពីឆ្នាំ២០២៣ ដល់ឆ្នាំ២០២៨។

សម្ដេចសង្កត់ធ្ងន់ថា ដើម្បីឱ្យគណបក្សអាចយកសេចក្ដីសម្រេចចិត្ត ទៅអនុវត្តជាកម្មវិធីនយោបាយរបស់រាជរដ្ឋាភិបាលអាណត្តិថ្មីបាន ទាមទារកត្តាសំខាន់តែមួយគាត់ គឺបន្តឈ្នះការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា នាខែកក្កដា ឆ្នាំ២០២៣ខាងមុខ។

ក្នុងឱកាសនោះដែរ សម្ដេចក្រឡាហោម ស ខេង ក៏បានគូសបញ្ជាក់អំពីការវាយតម្លៃសភាពការណ៍អន្តរជាតិ តំបន់ និងក្នុងប្រទេស គោលនយោបាយរបស់គណបក្ស ពាក់ព័ន្ធនឹងសភាពការណ៍ផ្ទៃក្នុងប្រទេស និងទិសដៅការងារសំខាន់ៗសម្រាប់ខេត្តបាត់ដំបង ៕