ឧត្តមសេនីយ៍ឯក ឆាយ គឹមខឿន ណែនាំនគរបាលប៉ុស្តិ៍រដ្ឋបាលត្រូវធ្វើការផ្សារភ្ជាប់ជាមួយអាជ្ញាធរ រដ្ឋាភិបាល និងប្រជាពលរដ្ឋ
ភ្នំពេញ៖ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានណែនាំនគរបាលប៉ុស្តិ៍រដ្ឋបាលត្រូវធ្វើការដោយផ្សារភ្ជាប់ជាមួយអាជ្ញាធរ រដ្ឋាភិបាល និងប្រជាពលរដ្ឋ។
ការណែនាំបែបនេះបានធ្វើឡើង ខណៈឯកឧត្តម តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម ប៉ែន កុសល្យ អភិបាលខេត្តឧត្តរមានជ័យ អញ្ជើញបិទវគ្គបណ្តុះបណ្តាល ស្តីពីតួនាទីភារកិច្ចរបស់ប៉ុស្តិ៍នគរបាលរដ្ឋបាល ការងារនគរបាលនិងសហគមន៍ និងអនុវត្តគោលនយោបាយ ភូមិ-ឃុំសង្កាត់មានសុវត្ថិភាព នៅសាលប្រជុំធំរដ្ឋបាលខេត្តឧត្ដរមានជ័យនាថ្ងៃទី១៣ ខែកុម្ភៈ ឆ្នាំ២០២៣។
ក្នុងឱកាសនោះ ឧត្តមសេនីយ៍ឯក ឆាយ គឹមខឿន ក៏បានណែនាំនគរបាលប៉ុស្តិ៍រដ្ឋបាលត្រូវធ្វើការដោយផ្សារភ្ជាប់ជាមួយអាជ្ញាធរ រដ្ឋាភិបាល និងជាមួយប្រជាពលរដ្ឋ ហើយដើម្បីឲ្យកិច្ចការនេះធ្វើទៅបានល្អ គ្រប់ការងារដែលយើងបំពេញត្រូវគោរពវិន័យប្រកាន់ខ្ជាប់ក្រមសីលធម៌ វិជ្ជាជីវៈរបស់កងកម្លាំង គឺត្រូវគោរព និងអនុវត្តដោយស្មោះត្រង់ជាមួយប្រជាពលរដ្ឋ រួសរាយរាក់ទាក់ជាមួយប្រជាពលរដ្ឋ និងមិនធ្វើឲ្យប៉ះពាល់ដល់ផលប្រយោជន៍របស់ប្រជាពលរដ្ឋ ហើយត្រូវមានអាកប្បកិរិយាសុភាពរាបសារ ស្លូតបូត ទន់ភ្លន់ ថ្លៃថ្នូរ តែម៉ឺងម៉ាត់ក្នុងការងារ និងមិនលើកលែងចំពោះបទល្មើស ពិសេសយកចំណេះដឹងទាំងអស់ដែលទើបទទួលបានពីវគ្គបណ្តុះបណ្តាល ទៅបម្រើជាសកម្មភាពជាក់ស្តែង។
ជាមួយគ្នានោះ ឯកឧត្តម បានស្នើឲ្យប៉ុស្តិ៍នគរបាលរដ្ឋបាលទាំងអស់ យកចិត្តទុកដាក់គ្រប់គ្រង ដឹកនាំប្រជាការពារ ព្រោះប្រជាការពារមិនមែនជាមន្ត្រីនគរបាលយុត្តិធម៌ តែក៏ជាកម្លាំងជំនួយដ៏សំខាន់ជួយដល់សមត្ថកិច្ចនូវរាល់កិច្ចការងាររបស់មន្ត្រីនគរបាលប៉ុស្តិ៍រដ្ឋបាល។ ឯកឧត្តម ក៏សូមផ្តាំផ្ញើដល់លោកស្នងការ លោកអធិការ សូមយកចិត្តទុកដាក់ត្រួតពិនិត្យដល់លោកនាយប៉ុស្តិ៍របស់ខ្លួន កុំឲ្យលោកនាយប៉ុស្តិ៍សំអាងទៅលើប្រជាការពារជាកម្លាំងជំនួយហើយខ្លួនជានាយប៉ុស្តិ៍មិនចុះជួបប្រជាពលរដ្ឋដោយផ្ទាល់។
ឯកឧត្ដម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ បានកោតសរសើរដល់នាយកដ្ឋានកិច្ចការប៉ុស្តិ៍នគរបាលរដ្ឋបាល និងស្នងការដ្ឋាននគរបាលខខេត្តឧត្តរមានជ័យ ដែលបានសហការគ្នាល្អក្នុងការរៀបចំបង្កើតឲ្យមានវគ្គបណ្តុះបណ្តាលដ៏មានសារសំខាន់នេះឡើង ហើយក៏ជាវគ្គគំរូមួយសម្រាប់ការងារលើកស្ទួយ ពង្រឹងសមត្ថភាពមន្ត្រីនគរបាលប៉ុស្តិ៍រដ្ឋបាលនៅទូទាំងប្រទេស។
ជាមួយគ្នានោះឯកឧត្តម សង្ឃឹមថា ក្រោយពីបញ្ចប់វគ្គនេះទៅតាមប៉ុស្តិ៍រដ្ឋបាលរបស់យើងនឹងមានមន្ត្រី ដែលមានសមត្ថភាពជួយការងារបម្រើសេវាប្រជាពលរដ្ឋ កាន់តែសកម្មថែមទៀត៕
