បង្រ្កាបមុខសញ្ញា ជួញដូរនិងប្រើប្រាស់គ្រឿងញៀន ២នាក់ ដកហូតវត្ថុតាងថ្នាំញៀនមួយចំនួន នៅស្រុកព្រះនេត្រព្រះ
ភ្នំពេញ៖ ជនសង្ស័យចំនួន០២នាក់ មុខសញ្ញាជួញដូរនិងប្រើប្រាស់គ្រឿងញៀន ត្រូវបានកម្លាំងការិយាល័យប្រឆាំងគ្រឿងញៀន សហកាជាមួយកម្លាំងអធិការដ្ឋាននគរបាលស្រុកព្រះនេត្រព្រះ ចុះបង្រ្កាបឃាត់បានជាបន្តបន្ទាប់ នៅចំណុចមុខវត្តទន្លាប់ ស្ថិតភូមិទន្លាប់ ឃុំប្រាសាទ ស្រុកព្រះនេត្រព្រះ ខេត្តបន្ទាយមាន វេលាម៉ោង០៤និង៣០នាទីល្ងាចថ្ងៃទី១៣ ខែកុម្ភៈ ឆ្នាំ២០២៣ ។
លោកឧត្តមសេនីយ៍ត្រី ស៊ិន ធិនដេត ស្នងការរង ទទួលផែនការងារបទល្មើសគ្រឿងញៀន បានឲ្យដឹងថា៖ អនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត ឲ្យកម្លាំងនគរបាលការិយាល័យជំនាញ សហការជាមួយកម្លាំងនគរបាលជំនាញនៅមូលដ្ឋាន ធ្វើការស៊ើបអង្កេតស្រាវជ្រាវបទល្មើសគ្រឿងញៀនឲ្យដូចជាភ្លៀងរលឹម ជាលទ្ធផល វេលាម៉ោង០៤និង៣០នាទីល្ងាចថ្ងៃទី១៣ ខែកុម្ភៈ ឆ្នាំ២០២៣ កម្លាំងសមត្ថកិច្ចនគរបាលយើងបានធ្វើការឃាត់ខ្លួន ជនសង្ស័យចំនួន ០១នាក់ឈ្មោះ តូ នីធី ភេទប្រុស អាយុ២៩ឆ្នាំ នឹងចាប់យកវត្ថុតាង ម្សៅក្រាម២កូនចង់ ទូរសព្ទ័ដៃ២គ្រឿង ។
លោកឧត្តមសេនីយ៍ ស្នងការរងបានបន្តថា៖ក្រោយពីឃាត់ខ្លួនជនសង្ស័យឈ្មោះ តូ នីធី កម្លាំងជំនាញបានធ្វើការសាកសួរចម្លើយឈានដល់ការឃាត់ជនសង្ស័យ០១នាក់ទៀតឈ្មោះ ង៉ាន់ ធុណា ភេទប្រុស អាយុ២២ឆ្នាំ នឹងចាប់យកវត្ថុតាងចំនួន ០៦កូនថង់ទៀត នៅចំណុច ផ្លូវលំស្ថិតនៅភូមិចាក្រោម ឃុំប្រាសាទ ស្រុកព្រះនេត្រព្រះ ។
បច្ចុប្បន្ន កម្លាំងយើងបាននាំជនសង្ស័យទាំង០២នាក់ និងវត្ថុតាងយកមក ការិយាល័យប្រឆាំងគ្រឿងញៀន ដើម្បីធ្វើការសាកសួរបន្ថែម និងរៀបចំសំណុំរឿងតាមនិតិវិធី៕
