ឯកឧត្តម ម៉ៅ ធនិន៖ រដ្ឋបាលខេត្តកំពត បានសម្របសម្រួល និងបញ្ចប់វិវាទក្រៅប្រព័ន្ធតុលាកាបានជាង១ពាន់ករណី ក្នុងរយៈពេលកន្លងមក
ភ្នំពេញ៖ ឯកឧត្តមបណ្ឌិត ម៉ៅ ធនិន អភិបាលខេត្តកំពត បានថ្លែងឱ្យដឹងថា រដ្ឋបាលខេត្តរួមជាមួយអាជ្ញាធរគ្រប់លំដាប់ថ្នាក់ មន្ទីរជំនាញគ្រប់ផ្នែកទាំងអស់ មានការចូលរួមសម្របសម្រួល និងបញ្ចប់នូវវិវាទក្រៅប្រព័ន្ធតុលាការរយៈពេលកន្លងមកនេះគឺបានរហូតទៅដល់១១៥៨ករណី។
ឯកឧត្ដមបានថ្លែងឱ្យដឹងបែបនេះ ក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ស្ដីពី ភាពជោគជ័យរយៈពេល៥ឆ្នាំ របស់រដ្ឋបាលខេត្តកំពតនាព្រឹកថ្ងៃទី១៦ ខែកុម្ភៈ ឆ្នាំ២០២៣។
ឯកឧត្តមអភិបាលខេត្ត បានឲ្យដឹងថា ក្រៅពីដោះស្រាយក្រៅប្រពន្ធ័តុលាការនេះ យើងមានវិស័យមួយទៀតគឺ វិស័យគាំពារសង្គម។
ឯកឧត្តមបន្តថា វិស័យគាំពារសង្គមនេះ ជាវិស័យមួយសំខាន់ណាស់របស់ប្រមុខរដ្ឋាភិបាលដែលជួយសម្រាល និងដោះស្រាយដោយផ្ទាល់ ហើយចំគោលដៅជាមួយតម្រូវការចាំបាច់របស់បងប្អូនប្រជាពលរដ្ឋរបស់យើង។
ឯកឧត្តមអភិបាលខេត្តបន្ថែមថា ក្នុងរយៈពេល៥ឆ្នាំកន្លងមកនេះ រាជរដ្ឋាភិបាល ក្រុមការងាររដ្ឋាភិបាល និងរដ្ឋបាលខេត្ត គឺបានចូលរួមផ្តល់នូវជនក្រីក្រ ស្រ្តីមានផ្ទៃពោះ កុមារក្រោមអាយុ២ឆ្នាំ និវត្តន៍ជន អតីតយុទ្ធជន គឺទទួលបានរបបសន្តិសុខសង្គមដែលជាការកំណត់ និងការផ្តល់ឱ្យរបស់រាជរដ្ឋាភិបាល និងកាកបាទក្រហមមូលនិធិសមធម៌ ទាំងអស់ចំនួន ១៧២,១៥៣នាក់ នៅក្នុងនោះស្មើនឹង ៧៤,៥៩៨គ្រួសារផងដែរ៕
