ឯកឧត្តមរដ្ឋមន្ត្រី ស៊ុយ សែម ទទួលជំនួបសម្ដែងការគួរសម និងពិភាក្សាការងារជាមួយ ឯកអគ្គរដ្ឋទូតនៃរដ្ឋកូវ៉ែតប្រចាំនៅកម្ពុជា

ភ្នំពេញ៖ ឯកឧត្តម ស៊ុយ សែម រដ្ឋមន្ត្រីក្រសួងរ៉ែនិងថាមពល នាព្រឹកថ្ងៃចន្ទ ០១កើត ខែផល្គុន ឆ្នាំខាល​ ចត្វាស័​ក​ ព.ស.២៥៦៦ ត្រូវនឹងថ្ងៃទី២០ ខែកុម្ភៈ ឆ្នាំ២០២៣ បានទទួលជួបសម្តែងការគួរសម និងពិភាក្សាការងារជាមួយឯកឧត្តម​ Mohamad S. ALHAJRI ឯកអគ្គរដ្ឋទូតនៃរដ្ឋកូវ៉ែតប្រចាំព្រះរាជាណាចក្រកម្ពុជា។

នៅក្នុងជំនួបពិភាក្សានេះ ឯកឧត្តម​ Mohamad S. ALHAJRI បានស្វែងយល់អំពីវឌ្ឍនភាពនៃការអភិវឌ្ឍវិស័យថាមពល​ ប្រេង​ និងឧស្ម័ននៅកម្ពុជា​។ ភាគីទាំងពីរបានជជែកពិភាក្សាអំពីសក្តានុពល និងឱកាសដើម្បីពង្រឹងកិច្ចសហប្រតិបត្តិការ​។

ឯកឧត្តមរដ្ឋមន្រ្តីបានធ្វេីការស្វាគមន៍វិនិយោគិនកូវ៉ែតដែលមានបំណងចង់វិនិយោគលេីវិស័យប្រេង​ និងឧស្ម័ន​ ដែលបច្ចុប្បន្ន​ កម្ពុជាមាន​ប្លុក​ offshore ចំនួន០៤​ និងប្លុក​ onshore ចំនួន១៨​ ទៀតដែលស្វាគមន៍ការវិនិយោគ។

លេីសពីនេះទៅទៀត​ ឯកឧត្តមរដ្ឋមន្រ្តីបានលេីកទឹកចិត្តអោយមានការវិនិយោគលេីវិស័យថាមពល​ និងធនធានរ៉ែផងដែរ​ ព្រោះបច្ចុប្បន្នយេីងអាចធ្វេីការងារបានគ្រប់ទីកន្លែង​ មិនថាក្នុងព្រៃជ្រៅ​ ឬតំបន់ដាច់ស្រយាល​ ដោយសារពេលនេះកម្ពុជាទទួលបានសុខសន្តិភាពពេញលេញ​ និងមានស្ថេរភាពនយោបាយ​ ដែលជាកិច្ចខិតខំប្រឹងប្រែងរបស់រដ្ឋាភិបាល​ ក្រោមការដឹកនាំរបស់សម្តេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្រ្តីនៃព្រះរាជាណាចក្រកម្ពុជា។

ឯកឧត្តម​ Mohamad S. ALHAJRI ក៏បានសម្តែងនូវការកោតសរសើរដល់ការដឹកនាំរបស់រាជរដ្ឋាភិបាលកម្ពុជា និងមានបំណងចង់ផ្តល់អាហាររូបករណ៍ក្នុងវិស័យប្រេង​ និងឧស្ម័នដល់និស្សិតកម្ពុជា​ ព្រមទាំងបេីកឱកាសការងារដល់និស្សិតដែលបានបញ្ចប់ការសិក្សា​ ដេីម្បីអោយទទួលបានបទពិសោធន៍ការងារពីជំនាញនេះនៅប្រទេសកូវ៉ែតផងដែរ ៕